يا ترى إيه معنى إن الحكومة تخصص 78 مليار جنيه في الموازنة الجديدة لمبادرات صناعية وسياحية، هل الرقم ده كبير ولا صغير، وإيه مدى أهميته، وإزاي ده هيفرق مع الاقتصاد المصري والمواطن البسيط؟
الحكومة المصرية، أعلنت عن مؤشرات الموازنة الجديدة 2025/ 2026، وخصصت منها 78 مليار جنيه علشان تدعم مبادرات صناعية وإنتاجية وسياحية، يعني تدعم الاقتصاد بشكل أكبر وأوسع وأشمل.
ونقدر نقول إن المبادرة دي بتأكد إن الحكومة ماشية على طريق واضح، وهو تعزيز الإنتاج والتصدير، وتقوية القطاعات اللي بتدخل فلوس حقيقية للبلد.
وبلغة الأرقام، تم تخصيص حوالي 29.6 مليار جنيه لدعم الإنتاج الصناعي، وده بنسبة نمو ضخمة عن السنة اللي فاتت، وكمان 5 مليار جنيه للصناعات ذات الأولوية، ودع معناه إن الدولة بتقدم دعم قوي جدا للقطاع الصناعي، عشان يشتغل ويعظم إنتاجه ويشغل الشباب.
كمان، التمويل ده فوايده هتكون مخفضة، علشان المصنعين يقدروا يجيبوا خامات ومعدات بدون ما يتحملوا أعباء زيادة، عشان الصناعة تنتعش وفلوس تدخل البلد ومعاها طبعا استثمارات مباشرة وغير مباشرة وكمان محلية وأجنبية.
وبالنسبة للسياحة، فتم تخصيص 8.4 مليار جنيه لدعم الاستثمار في السياحة، يعني فنادق وغرف فندقية أكتر، علشان نستوعب الزيادة في عدد السائحين، اللي وصلوا ل16 مليون سائح السنة اللي فاتت، ومتوقع الرقم يعدي 17 مليون سائخ السنة دي.
والدعم الحكومي لقطاع السياحي معناه إن في إيرادات سياحية أكتر هتخش البلد وبالتالي عملة صعبة وكمان شغل مباشر وغير مباشر لآلاف الشباب.
والمفاجأة برضو كانت بخصوص قطاع التصدير، لان الدولة خصصت 45 مليار جنيه لدعم الصادرات، وده هيعظم إيرادتنا اكتر وهيدخل عملة أجنبية أكتر، وفي نفس الوقت، ده هيخلي المنتجات المصرية تنافس في السوق العالمي.
عندك كمان، في 5 مليار جنيه حوافز نقدية للمشروعات الصغيرة والمتوسطة، اللي بتمثل أكتر من 90٪ من الشركات في مصر، يعني الحكومة بتدي دفعة قوية للاقتصاد، وكل ده هينعكس بشكل إيجابي في حياة الناس، السلع هتبقى متوفرة في السوق المحلي وبأسعار مناسبة وممكن كمان أسعار أقل، وبالتالي المواطن هيلاقي كل اللي يحتاجه بأسعار مناسبة، ده غير فرص العمل في المشروعات المختلفة في القطاعات دي يعني هتفتح بيوت آلالاف المصريين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
