مكالمة شكلها رسمي، واحد بيكلمك باسم البنك، بيقولك بياناتك صح، وبيقنعك إنه بيحاول يحميك، وفي الآخر، بيطلع هو اللي بيسرقك.
ولما تروح تسأل البنك، تكتشف إن الموضوع مش بسيط، وفيه فرق كبير بين إن البنك يكون مسؤول، وبين إنك تكون أنت السبب.
وإمتى البنك بيرجع الفلوس.. وإمتى يقولك دي غلطتك.. وإزاي تحمي نفسك وتتصرف صح لو فيه مكالمة مريبة.. فخليك متابع معانا ..
في زمن التكنولوجيا اللي ما بقتش بتسيب حاجة إلا دخلتها، كل يوم بنسمع عن حالات نصب واحتيال مالي جديدة بتستهدف حساباتنا البنكية.
الموضوع بقى موضة جديدة للنصابين، ومفيش حد مبسوط إنه يقع في الفخ ده، خصوصا لما ييجي حد يدعي إنه من البنك نفسه، ويتكلم بثقة ويحكي معلومات عنك، فيخليك تفكر.. هل ده فعلا موظف البنك ولا نصاب؟
الفرق بين الموظف الحقيقي والنصاب واضح، لكن للأسف مش الكل عارفه. موظف البنك الحقيقي عمره ما هيطلب منك الرقم السري للبطاقة، ولا الكود اللي بيجيلك في رسالة على موبايلك، ولا رقم البطاقة بالكامل بشكل عشوائي.
كمان مش هيطلب منك تدخل على لينك غريب أو تحمل تطبيق مش موثوق عليه.
لو حصل واتصل بيك حد وقالك أنا من البنك وطلب منك معلومات شخصية أو سرية، يبقى لازم تقفل المكالمة وتكلم البنك بنفسك من الرقم الرسمي اللي على ظهر بطاقتك أو من الموقع الإلكتروني للبنك.
ده حفاظ على فلوسك، لأن النصابين دلوقتي بيشتريوا معلومات شخصية من السوق السودا، وبيقدروا يخلوك تصدقهم بسهولة.
لكن سؤال مهم بيفكر فيه كل الناس.. لو اتسرقت فلوسي، هل البنك بيرجعها.. الحقيقة الموضوع معقد شوية.
لو انت بنفسك سلمت السرية دي للنصاب، سواء بالكود أو الرقم السري أو دخلت على رابط خداع، البنك غالبا مش هيكون مسؤول، لأنك عطيت المجرم فرصة وسلّمت له مفتاح حسابك.
أما لو حصل اختراق من جهة البنك نفسها أو من نظام الصرافات، والبنك يثبت إنك ما كانش ليك ذنب، بيبدأ تحقيق ويرجّعلك فلوسك في معظم الحالات.
وخليني أقولك.. التكنولوجيا في البطاقات البنكية اتطورت بشكل كبير، بقت في شريحة ذكية وميزة الدفع باللمس "contactless" اللي بتسهل العمليات وتخليها أسرع. لكن الميزة دي فيها مخاطرة لو ضاعت بطاقتك أو اتسرقت، لأن حد ممكن يستخدمها في عمليات دفع سريعة من غير ما يدخل الرقم السري في حدود مبلغ معين. عشان كده، لازم تبلغ البنك فورا لو بطاقتك ضاعت، وتتابع كشف حسابك بشكل دوري، وتستعمل التطبيقات البنكية لو فيها إمكانية توقف البطاقة مؤقتًا بنفسك.
الطريقة الأفضل للحماية تبدأ بوعي بسيط.. ما تديش بياناتك السرية لأي حد مهما ادعى إنه من البنك، ما تردش على مكالمات من أرقام غريبة، ولا تضغط على لينكات مش موثوق فيها. خليك دايما حذر، تابع حسابك، واطلب مساعدة البنك على الأرقام الرسمية لما تحس بأي حاجة غريبة.
موضوع الأمان المالي مش بس مسؤولية البنك، لكنه مسؤوليتنا إحنا كمان. لو اتعلمنا نميز الصح من الغلط، ونتصرف بحكمة، هنقدر نحمي فلوسنا من الوقوع في فخ النصابين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
