السبت، 07 يونيو 2025 01:28 م 6/7/2025 1:28:25 PM
نفى المطرب الشعبي إسماعيل الليثي، ما تردد بشأن انفصاله عن زوجته شيماء سعيد، مؤكدًا أنها مازالت زوجته، وذلك من خلال فيديو نشره عبر صفحته الرسمية على موقع التواصل الاجتماعي فيسبوك.
رد الليثي على اتهامات زوجته بالضرب والسرقة
وردًا على ما اتهمته به زوجته بشأن ضربها وسرقتها، قال إسماعيل في فيديو حمل عنوان "توضيح هام": "اللي حصل خناقة أسرية زي أي واحد اتخانق مع مراته وبينزل من البيت، صحيت من النوم، إحنا في العيد كل سنة وانتم طيبين، حصل مشكلة بسبب كلام بيني وبينها، زي أي حد مسك في مراته واتخانق مع مراته، وسيبتها ونزلت لا فيه ضرب ولا أي حاجة".
تأكيده على حسن معاملته لزوجته ورفضه الاتهامات
وتابع "مصر كلها عارفة مين أبو رضا وإني شبعان وإني دايما في زيادة ليها، مقدرش أقول حاجة عليها لأنها أم رضا، هي مراتي وأنا مخدتش حاجة وكل حاجة معاها ولو أخدت أي حاجة اتحاسب"، موجها رسالة لمن يتدخل في حياته مع زوجته "ياريت كل واحد يخليه في نفسه، لا أنا وحش ولا عمركم سمعتم عني حاجة وحشة، ودي خناقة أسرية بين راجل ومراته محدش يتدخل بينا، آه هي نزلت الفيديو وانفعلت، بس عشان محدش يقعد يكتبلي ما هي اللي نزلت وقالت، بس أنتم عارفين إنها مراتي، كل واحد بيتخانق مع مراته".
رسالة تهدئة ودعاء لزوجته
وأضاف إسماعيل "ربنا يهدي الحال ويهدي حالها ويديها الخير كله ويجعلها أحسن مني دايما، ومفيش بيني وبينها أي حاجة ومخدتش منها حاجة ولا باخد حاجة من حد ومحدش ليه عندي جنيه، محدش يتدخل ويكتب أخبار كاذبة ويقول ضربها وسرقها وخد دهبها، أنت شفت، حد شافني، طول عمري في زيادة ليها، وربنا يجعلها دايما من المستورين، هي لسه مراتي وعلى ذمتي".
فيديو شيماء سعيد واتهاماتها ضد زوجها
كانت شيماء سعيد نشرت عبر مواقع التواصل الاجتماعي فيديو، ظهرت خلاله منهارة من البكاء، واتهمت زوجها المطرب إسماعيل الليثي بضربها، والاستيلاء على أموالها، وتحطيم مقتنيات شقتهما.
