أسما شريف منير تعلن زواجها: "توكلت على الله واختار لي الأصلح

كشفت الإعلامية أسما شريف منير، بنت الفنان شريف منير، عبر حسابها الرسمي على موقع تبادل الصور ومقاطع الفيديوهات “إنستجرام” زواجها، قائلة: “أنا الحمد لله اتجوزت، وده قرار جه بعد فترة طويلة من رحلة عشتها مع نفسي”.

وتابعت أسما شريف منير: “من حاجات كتير قوي اتعلمتها، تجارب دخلت فيها، اختيارات وصلت لها، حاجات بقيت بحبها، وحاجات مابقيتش بحبها، فهمت نفسي أكتر، اتعرفت على نفسي أكتر، فهمت أنا محتاجة إيه من الجواز، إيه المهم وإيه اللي مش مهم، إيه اللي محتاج مجهود وإيه اللي مش محتاج مجهود”.

وأكملت أسما شريف منير: “وقعدت فترة كبيرة جدًا بدعي ربنا بإنه يعوضني خير ويعوضني خير صبري، لأني كنت في الفترة دي بحاول أقصى حاجة في الدنيا إني أحافظ على نفسي وما أغضبش ربنا، وحاولت إني أدعي ربنا كتير قوي إنه يقف جنبي ويختار لي، وكنت دايمًا بقول: يا رب اختار لي ولا تخيرني”.

وأضافت أسما شريف منير: “كنت مركزة جدًا في موضوع إني أتعامل بالتوكل، وتوكلت على ربنا تمامًا تمامًا في القرار ده، مردفة: تعاملت على إنه هو اللي هيجوزني وهو اللي هيقول لي أعمل إيه، قلت له: سهل لي الطرق المعينة اللي أنت عايزني أعملها، أنا نيتي خير ومش عايزة أعمل حاجة غلط وعايزة أتجوز وأتستر وأعيش حياة كريمة فيها احترام وفيها تقدير وفيها عوض”.

واختتمت أسما شريف منير: “وكلمت مع ربنا كتير لحد ما جه وقت صدقت جدًا وكان عندي يقين غير عادي إن ربنا هيحقق لي الحاجة دي، لأني كنت عديت بفترة تعب كبيرة قوي نفسي علشان أقدر أتخطى ده، كان بفكرة إنه صحيت نفسي في الشغل وتوكلت على ربنا ومقررة إنه هو هيختار لي الأصلح”.