لو عندك حساب في البنك..يا ترى بتفتح كشف حسابك البنكي كل فترة تتطمن على فلوسك ولا بتسيبه ومش بتسأل فيه؟ هل عمرك فكرت إن كشف الحساب ده مش مجرد ورق ده ممكن يكون خط الدفاع الأول لفلوسك؟ طيب إيه أهم الحاجات اللي لازم تبص عليها أول ما كشف الحساب يوصلك؟ وإزاي متابعتك المستمرة مع البنك بتضمن إن فلوسك في أمان تام؟ .. تعالوا نعرف سوا ليه مراجعة كشف الحساب ده مش رفاهية، ده ضرورة.
خلونا نعرف الأول .. ليه كشف الحساب مهم؟
بص يا سيدي كشف الحساب ده زي كاميرا المراقبة اللي بتسجل كل حركة بتحصل على فلوسك.. لما تراجعه باستمرار بتضمن كذ حاجة زي.
انك بتكتشف أي حركة غريبة بدري.. يعني لو فيه عملية شراء مشبوهة أو سحب أنت معملتوش أو تحويل مجهول كشف الحساب هو أول حاجة هتكشفهالك.. كل ما تكتشف بدري كل ما فرصتك ترجع فلوسك أو توقف الاحتيال بتكون أكبر.
كمان من خلال متابعة كشف الحساب .. بتتأكد إن البنك عامل شغله صح.. وارد يحصل خطأ من البنك في عملية سحب أو إيداع وكشف الحساب بيخليك تراجع كل العمليات وتتأكد إنها مظبوطة 100%.
كمان من فوايد متابعة كشف الحساب .. انك بتتابع مصاريفك وبتتحكم فيها بعيداً و كشف الحساب بيخليك تشوف فلوسك بتروح فين وبتيجي منين وده بيساعدك تتحكم في ميزانيتك وتعرف تصرفاتك المالية.
طب إيه اللي لازم تتابعه أول بأول؟
فيه حاجات معينة لازم عينك تيجي عليها أول ما تفتح كشف الحساب أو لما تراجع حسابك أونلاين.. زي العمليات اللي متعرفهاش.. يعني أي عملية سحب، إيداع أو شراء أونلاين أو تحويل مش أنت اللي عملته دي علامة خطر حمرا لازم توقف عندها وتتصرف فورا.
برضوا المبالغ غير المنطقية لازم تتباعها .. ممكن تكون عملية أنت عملتها فعلاً، بس المبلغ أكبر أو أقل من اللي المفروض تدفعه.. راجع الفاتورة الأصلية وقارنها باللي في الكشف.
كمان العمليات المتكررة أو الصغيرة المشبوهة.. أحياناً المحتالين بيسحبوا مبالغ صغيرة جداً ومتكررة عشان ماتاخدش بالك. ركز في أي خصومات بسيطة وغريبة بتتكرر.
ولازم برضوا تتأكد إن التواريخ اللي في الكشف منطقية ومطابقة للعمليات اللي أنت فاكرها وحاول تقرا وصف العملية كويس عشان لو فيه أي اسم غريب أو مكان معرفتهوش.
إزاي تتابع مع البنك عشان فلوسك تبقى في أمان؟
متابعتك مش بس لكشف الحساب، ده لازم تكون على تواصل مع البنك في أي وقت تشك فيه:
لازم تتباع باستمرار و أول ما تكتشف أي عملية مشبوهة أو غريبة في كشف الحساب كلم خدمة عملاء البنك فوراً كل دقيقة بتفرق.. وبعد المكالمة الأفضل إنك تسجل بلاغ رسمي في البنك وتطلب رقم مرجعي للبلاغ بتاعك.. ده بيضمن متابعة المشكلة بشكل جدي.
وحاليا معظم البنوك بتوفر خدمة إشعارات بتجيلك على الموبايل أو الإيميل بأي حركة بتحصل على حسابك (سحب، إيداع، شراء). فعل الخدمة دي عشان تكون أول واحد يعرف لو حصل أي حاجة.. و لو غيرت رقم تليفونك، عنوانك، أو إيميلك، بلغ البنك على طول عشان تفضل رسائل التوعية والإشعارات توصلك.
وخليك فاكر .. كشف حسابك ده مش مجرد ورق ده خط دفاعك الأول.. مراجعته الدورية ومتابعة أي حاجة غريبة مع البنك بتضمن إن فلوسك في أمان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
