يا ترى إيه قصى الإعفاء الكامل من الضرايب لصناديق الاستثمار العقاري، هل الحكومة فعلاً أعفت نهائيا، وهل القرار ده مفيد؟ ولا فيه حاجات مستخبية، هو إيه أصلًا صندوق الاستثمار العقاري؟..
ببساطة كده، صندوق الاستثمار العقاري، بيجمع فلوس من المستثمرين وبيستثمرها في العقارات، يعني بدل ما تشتري شقة، تشارك في الصندوق، وتاخد عائد من إيجار أو بيع العقارات اللي بيستثمر فيها.
ومؤخرا، الحكومة قررت تعفي الصناديق دي من الضرايب، وده معناه عائد أعلى للمستثمرين بس هل دي خطوة ذكية ولا مغامرة؟
بص يا سيدي، الخبير الاقتصادي هاني توفيق قال إن الحل الوحيد لإنقاذ السوق العقاري هو تفعيل صناديق الاستثمار العقاري، خصوصا إنها ممكن تشتري ملايين الوحدات اللي دلوقتي مقفولة ومش بتتباع، وده لأننا عندنا فوق 10 مليون شقة مقفولة في مصر، لا بتتأجر ولا بتتبعاع ولا بتستخدم، وده عامل جمود رهيب في السوق، ولو الصناديق دي دخلت واشترت الوحدات دي، هنقدر نأجرها، ونتخلص من الأزمة، ونحرك السوق العقاري تاني.
ومش بس كده، هاني توفيق قال كمان، إن الصناديق دي ممكن تحل مشاكل أكبر، زي القروض العقارية اللي مش بتتسدد في البنوك، يعني كأنك بتلم الخسائر وبتحولها لأصل شغال.
وبروضو قال إن صناديق الاستثمار العقاري ممكن تساعد الدولة نفسها في تخفيف مديونيتها، وده هيتم عن طريق تسييل أصول أو تأجير عقارات حكومية مقابل دخل ثابت للصناديق، وطبعا الشباب مستفيد أكتر حد في القصة دي، لأن الصناديق دي مش بتفكر تبيع هي بتأجر، يعني شباب كتير ممكن يلاقي سكن بالإيجار بدل ما يدفن نفسه في قرض عقاري بالملايين.
طيب لحد هنا كله جميل، فين العيوب؟
أول حاجة هي الشفافية، مين هيشرف على الصناديق دي ومين هيضمن حقوق الناس؟، وتاني حاجة هي المضاربات، فلو الصناديق الكبيرة بدأت تشتري عقارات بالجملة، ممكن الأسعار تطير تاني، ويبقى إحنا بنحل مشكلة ونعمل 3 غيرها.
وثالث حاجة، مين المستفيد؟، هل الصناديق دي فعلاً مفتوحة للناس العادية، ولا هي لعبة للمستثمرين الكبار وشركات التأمين والبنوك بس؟
والمفروض يكون فيه رقابة مالية قوية، وتنظيم صارم، علشان ما تتحولش الصناديق دي لأداة احتكار أو لعبة بيزنس مغلقة على شلة معينة، بس خلينا نقول بصراحة لو الخطوة دي لو اتنفذت صح، هتكون نقلة نوعية في السوق العقاري المصري، خصوصا بعد الجمود اللي شوفناه السنين اللي فاتت.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
