ايه قصة المشروعات الاستثمارية السعودية الجديدة في مصر.. وايه المفاجأة اللي كشف عنها الهيئة العامة للاستثمار في الساعات الأخيرة.. وحجم الاستثمارات السعودية وصل كام..
الحقيقة اللي بيحصل في سوق الاستثمار المصري اليومين دول وبعد صفقات رأس الحكمة وغيرها محصلش قبل كده في تاريخ مصر كله ودا دليل واضح إن الاقتصاد المصري أخيرا مسك الطريق الصح اللي ممكن يوصله للعالمية بدل سياسة المسكنات وترحيل المشاكل اللي كانت بتنفيذها حكومات ما قبل السيسي.. ولو بصينا على حجم الاستثمارات اللي جت مصر في اخر سنة هتلاقي رقم ضخم وصفقة رأس الحكمة وحدها بـ 35 مليار دولار وهتوصل لـ150 مليار دولار وبعدها فتح هويس المليارات على الأسواق المصرية واستقبلت المنطقة الاقتصادية لقناه السويس مليارات الدولارات.
كمان مصر أعلنت عن اتفاقيات استراتيجية وصفقات ضخمة لإنشاء مناطق صناعية روسية وألمانية وتوسعات المنطقة الصناعية الصينية الجديدة ودا غير المشروعات اللي تم الإعلان عنها في الساحل الشمالي وفي البحر الأحمر وفي العاصمة الإدارية الجديدة ومشروعات المدن الجديدة.. لكن هتفضل صفقة رأس الحكمة هي وش الخير زي ما بيقول المصريين لأن بعدها الاستثمارات الخليجية قفزت في مصر بشكل غير مسبوق..
الجديد في الاستثمارات الخليجية اللي كشف عنه رئيس الهيئة العامة للاستثمار والمناطق الحرة حسام هيبة لما قال إن مصر تلقت طلبات من عدد من المستثمرين السعوديين لتخصيص أراضي لتنفيذ مشروعات جديدة في مختلف المجالات.. ودا بعد قيام بعرض حزمة فرص استثمارية على عدد كبير من المستثمرين السعوديين المشاركين في منتدى الاستثمار المصري السعودي وإنه فيه فرص استثمارية وصفقات من العيار التقيل هيتم الاعلان عنها قريب مع المستثمرين السعوديين وبعض الشركاء بمصر.
رئيس الهيئة محددش عدد الشركات السعودية اللي بتدرس فرصًا استثمارية في مصر لكن قال حاجة مهمة جدا وهي إن الأهم من عدد المستثمرين الجدد هي عودة حركة الاستثمارات من جديد على مستوى الدول العربية كالسعودية والكويت والإمارات وعمان وقطر والاتحاد الأوروبي في مصر .. ودا مكانش هيحصل طبعا غير باللي نفذته الدولة المصرية على مدار ال10 سنين اللي فاتت من بنية أساسية قوية وإصلاح تشريعي وتصحيح التشوهات المالية وتيسير حركة الاستثمار والتجارة ورقمنة الإجراءات والقضاء على الروتين..
طيب ليه بنفرح بالاستثمارات الجديدة ؟.. علشان اي دولار بيدخل البلد بيغير ويأثر في الاقتصاد المصري وبيخفض سعر الدولار في البنوك وبيخفض أسعار السلع المستوردة وبالتالي أسعار السلع هتنزل في الأسواق وكمان معناها استقرار مالي كبير وإن الاحتياطي النقدي هيستمر في الصعود وهنقدر نسدد الديون من غير أي ضغوط ودا غير المرونة والقوة المالية اللي بتخلي الحكومة تصرف كويس على الخدمات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
