يا ترى هو ليه الدهب نزل تاني، وإيه أسباب نزيف خساير الأونصة العالمية، وعيار 21 اللي خسر لوحده 400 جنيه من أعلى سعر له، هل دا معناه إن الذهب هيرخص؟ ولا دي فرصة نشتري؟، وإإيه اللي ممكن يحصل في أسعاره مع نهاية 2025؟
دلوقتي، أسعار الذهب العالمية نازلة بنسبة 0.6%، والأونصة بقت بحوالي 3297 دولار بعد ما كانت فوق ال 3317، يعني فيه خسارة أسبوعية تقريبا بنسبة 1.8%.
والسبب هو إن الدولار بيقوى شوية، والأسواق كلها مستنية تقرير التضخم الأمريكي الجديد اللي ممكن يحدد لو الفيدرالي الأمريكي هينزل الفايدة ولا لأ، يعني الموضوع كله متعلق بحركة الدولار، كل ما الأخضر يقوى، الدهب بيضعف والعكس صحيح.
بس خلي بالك، ده مش معناه إن الدهب هيفضل نازل على طول، لأن الوضع مش مستقر، لا في أمريكا ولا في الصين ولا في أي حتة تانية.
نيجي بقى للمحلي، الدهب عندنا في مصر بيعيش حالة تذبذب، يعني يوم طالع ويوم نازل، مش ماشي على خط واحد، يعني مثلا عيار 21 بيدور حوالين 4600 جنيه للجرام، بس كان قريب من 5000 جنيه من كام أسبوع.
والسبب في التراجع ده، مش بس عشان الأونصة نزلت، لأ ده كمان عشان الدولار نزل في البنوك، وحاليا الحكومة عملت إجراءات اقتصادية قوية الفترة اللي فاتت، وصندوق النقد خلص المراجعة الخامسة، وده زوّد ثقة المستثمرين، فالدولار نفسه ابتدى يهدى وده ضغط على سعر الدهب المحلي.
طيب إيه التوقعات بقى؟
لو الدولار العالمي كمل في تقويته والفيدرالي الأمريكي ما خفضش الفايدة، يبقي الأغلب إن الدهب العالمي هيكمل في النزول مؤقتا، لكن لو بيانات التضخم الأمريكي جت ضعيفة، أو حصلت أزمة جديدة في السوق العالمي زي ما بنشوف فجأة، ساعتها الناس هتهرب تاني للدهب كملاذ آمن، وساعتها الأسعار ممكن تطير فوق تاني.
أما في مصر، فالوضع هيعتمد على حاجتين، اولها هي حركة الأونصة العالمية، وتانيها هو سعر الدولار مقابل الجنيه، فلو الجنيه فضل قوي حتى مع ارتفاع الأونصة، الأسعار مش هتزيد بنفس القوة، ولو الاتنين طلعوا سوا، يبقى نستعد لموجة جديدة من الارتفاعات.
والخلاصة هي إن الدهب دلوقتي ماشي بشكل عرضي، وبيجمع زخم لحركة جديدة، إما لفوق أو لتحت، والقرار دلوقتي في إيدك، يعني لو ناوي تشتري تابع حركة الدولار والتقارير الأمريكية كويس جدا، ولو ناوي تبيع خليك صاحي لأي ارتفاع مفاجئ في السوق، وخليك فاكر إن الدهب دايما ملاذ آمن، بس لازم تبقى فاهم كويس هو رايح على فين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
