ناس كتير بتسال ليه البنك المركزي اخذ قرارات برفع أسعار الفائدة، وليه فاجاة كده قرر تاني يخفض اسعار الفايدة، واية تاثير قرارات رفع أو خفض الفايدة علي الاقتصاد المصري.. وليه الحكومة كل خطواتها حاليا بخفض اسعار الفايدة.
علي مدار الشهور اللي فاتت كانت كل قرارات لجنة السياسات النقدية بالبنك المركزي منحصره بين قرارات رفع اسعار الفايدة أو تثبيتها، والقرارات دي وصلت اسعار الفايدة في مصر لارقام قياسية مش موجودة في العالم كله، وكان الهدف من القرارات دي هيا المحافظة علي الاستثمارات والودائع اللي بالعملات الأجنبية في البنوك الوطنية، خصوصا أن الاقتصاد المصري في الأوقات دي شهد دخول ارقام كبيرة من الأموال الساخنة اللي كانت الحكومة غالبا بتستخدمها في سداد التزاماتها الخارجية خصوصا فيما يتعليق بسداد الديون أو فوايدها.
للاسف الفايدة المرتفعة اللي كانت الحكومة بتقدمها في البنك علي قد ما نفعت في جذب استثمارات اجنية بارقام كبيرة خصوصا من الأموال الساخنة، ولكنها كانت سبب اساسي في تصفيه نسبة كبيرة من الاستثمارات الصغيرة والمتوسطة في السوق المصري، واللي كانت بتستحوذ علي نسبة كبيرة من الايدي العاملة في السوق المصري، ده غير أنها كانت بتغطي جزء كبير من الاحتياجات المحلية من الصناعات اللي بيحتاجها المواطن المصري، وبعدما انواع كتيرة من الصناعات دي توقفت الحكومة بدأت تستوردها من الخارج علشان تغطي النقص اللي بقي موجود في السوق المصري، وده عمل عبئ اضافي علي الفاتورة الاستيرادية لمصر، وضاعف الأرقام اللي كانت الحكومة بتخصصها للاستيراد من الخارج.
النتيجة العكسية اللي سببتها ارتفاع اسعار الفايدة في مصر ، الحكومة بدأت تعالجها في الوقت الحالي خصوصا بعد ما الحكومة قدرت تسيطر علي التضخم في مصر بعد ما ارتفع بارقام كبيرة خلال السنين اللي فاتت، وحاليا لدولة بدأت تعالج اسعار الفايدة المرتفعة وخلال اجتماعين للجنة السياسيات النقدية البنك المركزي قرر تخفيض اسعار الفايدة بنسبة 225 نقطة اساس في الاجتماع الأول و100 نقطة اساس في الاجتماع التاني، وكل التوقعات بتأكد أن البنك المركزي مكمل خطة خفض الارتفاع الكبير في اسعار الفايدة في مصر، وأغلب القرارات اللي جاية للجنة السياسات النقدية بالبنك المركزي هتكون بخفض جديد لاسعار الفايدة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
