علق الإعلامي تامر أمين على تعادل النادي الأهلي أمام فريق غزل المحلة بدون أهداف في المباراة التي أقيمت بين الفريقين مساء اليوم ضمن منافسات بطولة الدوري.
وقال أمين خلال برنامج "أخر النهار" المذاع على قناة "النهار": "بالنسبة للاهلاويه الماتش اللي لسه خلصان من شويه ما بين الأهلي وغزل المحلة مالوش معنى إلا حرق الدم حرق الدم من الطراز الرفيع".
وأضاف: "الاول قبل ما نتكلم عن الاهلي والبخت والتوفيق وكذا لازم لازم نقول انه سيبك من الخطة لكن انا الروح والاستبسال اللي لعب بيه لعيبه غزل المحلة يستحقوا عليهم التحية بصراحة يعني الروح اللي كانوا بيلعبوا بيها انا حاسس ان هم كانوا بيلعبوا في نهائي كاس العالم مش مباراه في الدوري".
وتابع: "لعيبه المحلة عملوا مباراة دفاعيه اهم ما فيها الاستبسال والروح كل واحد منهم كأنه بثلاثة اربعه وبثلاث أربع رئات واستبسال وروح قتاليه واستموات على الكورة ويعني بقول لكم كأنه ماتش اخر ماتش العبوه في عمرهم وماقدرش ألومهم حقهم بيلعبوا لناديهم ولجمهورهم ولهم كل التحية".
وواصل: "لكن حرقه الدم بقي الناحية الثانية لأنه الاهلي الحقيقة ما تقدرش تلومه الاهلي ما تقدرش تلومه انا ممكن الوم على ريبيرو في التغييرات في اخر ربع ساعة لكن على مجمل ال 90 دقيقه الاهلي عمل كل حاجه في الكورة".
وأوضح: "لكن الحقيقة انه النهارده جنرال حظ وجنرال توفيق ما كانش عايز الاهلي يكسب بسيطه وسهله بقول لكم على مدار ال 90 دقيقه الاهلي عمل كل حاجه في فنون كره القدم تحركات وسيطرة واستحواذ وتمريرات واختراقات من العمق واختراقات من الاجناب وراسيات وتسديدات الكرة مش عايزه تخش الكرة".
وأوضح: "في جانب عدم توفيق كبير في اللمسة الأخيرة من بعض اللاعبين في الاهلي عامر عامر حارس المحل عمل اداء رائع وكورتين في العرضة واحده بتاعه تريزيجيه في الشوط الاول وواحده بتاعه أشرف داري في الشوط الثاني".
وذكر: "الاهلي تقريبا عمل كل حاجه الا ان الكره تخش بتحصل بتحصل في مرات الاهلي بيبقى وحش ويكسب وفي مرات الاهلي يبقى كويس زي النهارده وما يكسبش هذه كره القدم".
واختتم: "انا بس بحميكم من رده فعل المحللين بتوع السبوبه اللي هيطلعوا دلوقتي يقول لك اداء مش عارف ايه ومدرب وحش واللاعيبه وحشه وما فيش تجانس وما فيش هيقعدوا يخبطوا طول ما النتيجة ايه صفر صفر لكن انا بقول لكم ان الاهلي لعب مباراه جيده التوفيق فقط هو اللي حال دون تحقيق الاهلي للنصر".
