سد النهضة مشروع فاشل بكل المقاييس.. قالوا إنهم ركبوا 13 من التوربينات وعملوا إحتفال بس اللي ركبوا بجد كانوا 4 و ولا واحد فيهم شغال وبسببهم السودان بتواجه فيضانات.
ولولا السد العالي كان زمان الأراضي الزراعية في مصر حصلت السودان.. يا ترى إيه كواليس اللي بيحصل في اثيوبيا وليه العالم كله بيتكلم عن فشلهم ومصر ردت إزاي.. تعالوا نعرف ايه الحكاية؟
إثيوبيا طلعت قدام العالم وقالت بكل ثقة ان سد النهضة خلص وافتتحناه خلاص وكأنها كده بتقفل صفحة من جدل وقلق وسنين مفاوضات.
بس الحقيقة اللي ورا الستارة كانت عكس كده خالص والدكتور عباس شراقي استاذ الجيولوجيا والموارد المائية بجامعة القاهرة طلع يكشف كل حاجة وقال بكل وضوح ان سد النهضة فاشل وفي مشاكل فنية كبيرة جوه السد وان التوربينات مش شغالة اساسا.
قال ان كان مفروض يتثبت ١٣ توربينة لكن اللي اتركب فعليا ٤ بس ولا واحدة فيهم شغالة وان ده السبب الحقيقي لتأجيل الافتتاح كذا مرة لان اثيوبيا مش عايزة شعبها يعرف ان المشروع اللي بيتقال عليه انه عظمة عطلان ومش جايب الكهربا اللي وعدوا بيها.
ولما موسم الأمطار جه البحيرة اتحجز فيها مياه زيادة عن طاقتها فاضطروا يفتحوا ٤ بوابات مرة واحدة عشان يصرفوا اللي اتجمع بسرعة وده عمل فيضان مفاجئ في السودان.
الدكتور شراقي وضح كمان ان الكميات اللي اتصرفت كانت ٧٥٠ مليون متر مكعب يوميا والمياه اندفعت على سد الروصيرص في السودان واللي كان اصلا مليان فاضطر السودانيين يفتحوا كمان وطبعا المياه كلها دخلت على مصر.
وهنا ظهرت اهمية السد العالي اللي مصر بنته من سنين وناس كانت فاكرة انه خلاص دوره خلص بس في اللحظة دي رجع ووقف وقفة رجالة انقذ مصر من كارثة كانت هتحصل لولا وجوده
عباس شراقي قال ان بحيرة ناصر ارتفعت مترين في شهر واحد بس يعني حوالي ١٥ مليار متر مكعب من المية اتخزنوا من غير ما يحصل غرق ولا دمار.
ومافيش مبالغة لما قال ان لولا السد العالي نص الاراضي الزراعية في مصر كانت خرجت من الخدمة لان اثيوبيا حجبت حوالي ١٠٠ مليار متر مكعب من المية على مدار خمس سنين ولو مصر ماكنتش مجهزة نفسها كانت اتأثرت بشكل كبير لكن اللي حصل ان مصر صمدت لان عندها خطة طويلة المدى.
ولما اثيوبيا طلعت تقول خلاص افتتحنا والسد بقى امر واقع واللي حصل حصل طلع الرد من مصر رسمي على لسان وزير الخارجية بدر عبد العاطي في كلمته قدام الجمعية العامة للأمم المتحدة وقال جملة صريحة اثيوبيا متوهمة لو فاكرة ان مصر هتنسى حقوقها ومصالحها الوجودية في نهر النيل.
وقال كمان ان اثيوبيا بتخالف القانون الدولي وانها بتمشي بسياسات فردية بتزعزع استقرار المنطقة وان مصر مش هتقبل بكده ولا هتسكت واكد اننا مستعدين نروح للتحكيم الدولي لو اثيوبيا عندها نية صافية وان مصر مش هتتهاون في حماية حقها وانها قادرة تدافع عن مصالحها في كل المحافل.
والكلام ده مش كلام سياسة بس ده كمان بيوصف اللي جوا الناس الشعب اللي شايف وفاهم وعارف ان اللي بيحميه مش سد النهضة اللي مش شغال انما سد عالي اتبنى على علم وعزيمة وشغل من زمان وان لما الجد جه كانت مصر جاهزة.
اثيوبيا حاولت تبيع للعالم صورة نجاح لكن الواقع كشف عكس كده مفيش كهربا مفيش تشغيل في فيضان في أضرار اقتصادية وسودان اتغرق وكل ده سببه تصرف فردي من غير تنسيق لا مع مصر ولا مع السودان.
ومع ذلك مصر ما قامتش بهجوم ولا قالت هنرد بالقوة مصر وقفت وقالت بكل ثقة احنا مش بننسى حقوقنا واحنا مش هنتنازل عن نقطة مية واحنا عارفين احنا بنعمل ايه وعارفين امتى نتكلم وامتى نتحرك وامتى نسكت بس لما نيجي نرد بيكون ردنا تقيل ومسموع.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
