بعد صفقة "إعمار" و"شربتلي" الضخمة.. مصر بتجهز لمفاجأة كبيرة في البحر الأحمر

هو إيه حكاية الأراضي اللى مصر هتطرحها في البحر الأحمر الفترة الجاية؟.. وهل فعلا ممكن تدخل للبلد 3 مليار دولار ؟ وايه علاقة الأراضي دي بمشروعات اعمار والشربتلي؟

الحكومة المصرية هتطرح 14 قطعة أرض في محافظة البحر الأحمر.. القطع دي مش عادية.. لأن مصر بتستهدف منها جمع أكتر من 150 مليار جنيه.. أو ما يقرب من 3.12 مليار دولار.. المبلغ ده مش هييجي من فراغ.. هييجي من مستثمرين عايزين يستثمروا في مشاريع سياحية وخدمية وصناعية.. واللي متوقع إنها توفر حوالي 5 آلاف فرصة عمل.

الخطة دي بتيجي في وقت مهم جداً.. الاستثمارات في منطقة البحر الأحمر بتتسارع بشكل غير طبيعي.. إعمار مصر ورجل أعمال سعودي أعلنوا عن استثمار ضخم بـ 900 مليار جنيه.. أو حوالي 18.5 مليار دولار.. عشان يعملوا مشروع جديد على مساحة كبيرة جداً.. ده بيثبت إن البحر الأحمر دلوقتي هو المغناطيس اللي بيشد المستثمرين.

طب إيه سر البحر الأحمر؟

المستثمرين دول شايفين إن البحر الأحمر مش مجرد شواطئ.. ده موقع جغرافي مميز جداً.. بيفتح لهم أسواق جديدة.. كمان الحكومة المصرية بتعيد تقييم الأصول العقارية اللي على البحر الأحمر والمتوسط.. وده عشان تنظم السوق.. وتضمن إن الدولة تاخد أعلى عائد من المشاريع دي.

الخطوات دي كلها.. بتؤكد إن الحكومة المصرية عندها خطة واضحة.. هدفها جذب استثمارات أجنبية مباشرة.. واللي هي الحل السحري لأزمة الدولار.. مصر بتستهدف تجذب استثمارات بقيمة 42 مليار دولار في السنة المالية اللي هتخلص في 30 يونيو 2026.. وبتراهن بشكل كبير على رؤوس الأموال الخليجية.. خصوصاً من السعودية والكويت وقطر.

الهدف الأكبر من طرح الأراضي دي.. هو إننا نجيب دولار للبلد.. ونحل أزمة العملة الصعبة.. الاستثمار في العقارات والمشاريع السياحية بيوفر عملة أجنبية بشكل مباشر.. وده بيساعد في استقرار سعر الجنيه.

كمان.. فيه مؤشرات إيجابية تانية.. رئيس الوزراء قال إن فيه صفقات تانية كبيرة هيتم توقيعها في البحر الأحمر والساحل الشمالي.. وده بعد صفقة إعمار الضخمة.. ده معناه إن فيه خطة مستمرة لجذب المستثمرين.. وإن الموضوع مش صدفة.