مصر هتعمل إيه بعد صندوق النقد.. مشروعات مليارية هتحل كل الأزمات

يا ترى مصر هتعمل ايه بعد انتهاء علاقتها مع صندوق النقد الدولي؟ وازاى الحكومة بتفكر فى عدم الاعتماد على الاقتراض تاني؟  وايه حكاية المشروعات المليارية اللي هتحل كل الأزمات؟

مصر ناوية تبدأ مرحلة جديدة.. مرحلة مفيهاش اعتماد على القروض.. خصوصاً من صندوق النقد الدولي.. الحكومة المصرية أعلنت عن رؤية اقتصادية للـ 5 سنين اللي جايين.. وقالت إنها مش ناوية تدخل في برنامج جديد مع صندوق النقد بعد ما برنامجها الحالي يخلص في أكتوبر اللي جاي.

الرؤية دي.. اللي اتسمت "السردية الوطنية للتنمية الاقتصادية".. مش مجرد كلام.. دي خطة طموحة جداً.. ليها أهداف واضحة.. أهمها إننا نوصل بمعدل النمو الاقتصادي لـ 7% بحلول 2030.. بعد ما كان 4.5% بس في خطة السنة المالية الحالية.

الحكومة المصرية حطت أهداف مالية ضخمة عشان تقدر تستغنى عن القروض..و بتستهدف إنها تقلل معدلات الدين لأقل رقم في تاريخ البلاد.. وقالت إنها هتخصص 50% من فلوس بيع الأصول الحكومية عشان تقلل الدين ده.

كمان عايزين يزودوا الاستثمارات الكلية عشان توصل لـ 18% من الناتج المحلي الإجمالي.. كمان نسبة المشروعات الخضراء هتزيد لـ 75%.. وكمان القطاع الخاص هيكون له دور أكبر.. لإن الاستثمارات الخاصة هتزيد لـ 66% من إجمالي الاستثمارات.

رئيس الوزراء مصطفى مدبولي أكد إن القطاع الخاص هو اللي هيقود التنمية الفترة اللي جاية.. وده معناه إن الدولة هتبدأ تنسحب من بعض الأنشطة الاقتصادية.. وهتسيب المجال للمستثمرين.

الخطة مش بس أرقام.. الخطة بتشمل خطوات عملية جداً لحل مشاكل قديمة..الحكومة اشتغلت على إعادة تشغيل 1235 مصنع من 6000 مصنع متعثر في مصر.. وده هيزود الإنتاج والصادرات.. وهيوفر فرص عمل.

الحكومة عايزة تزود الصادرات بنسبة 20% كل سنة لحد 2030.. وده هيوفر دولارات كتير.. وهيقلل من أزمة العملة الصعبة.. كمان عايزين نوصل عدد المصانع لـ 100 ألف مصنع بحلول 2030.

وفيه تسهيلات ضريبية هتصدر قريب.. وهيبقى فيه منصة واحدة للمستثمرين.. يعني بدل ما المستثمر يدفع رسوم كتير لجهات مختلفة.. هيدفع في مكان واحد بس.. وده هيشجع المستثمرين.

مصر بتفكر بشكل استراتيجي للمستقبل.. مش مجرد حلول مؤقتة.. الخطة دي بتبين إن فيه رؤية حقيقية لتقليل الدين.. وزيادة الإنتاج.. وتشجيع القطاع الخاص.. عشان الاقتصاد يقف على رجليه من غير ما يحتاج لقروض تانية.