الحملة غير المسبوقة، اللي نفذها وزارة الداخلية على مشاهير التيك توك، بهدف حماية المجتع في الفيديوهات الخادشة للحياء ومحتويات الفاضحة.. كشفت عن خيوط أخطر شبكة غسيل أموال شافتها السوشيال ميديا في مصر.
ومع سقوط مشاهير التيك توك واحد بعد التاني.. خيوط كتير اتكشفت.. مليارات المشاهدات اللي تحولت لملايين الجنيهات، وتم ضخها في عقارات، محلات، وسيارات فارهة.
إمبارح محكمة جنايات القاهرة قررت التحفظ على أموال عدد كبير من صناع المحتوى اللي تحولوا من نجوم السوشيال لمتهمين في قضايا غسيل أموال.
طب مين دول.. وإزاي صعدوا على الساحة بقوة الصاروخ.. وإيه اللى حصل معاهم.
محكمة الجنايات اليوم قررت التحفظ على أموال مريم أيمن محمد الدسوقي الشهيرة بـ"سوزي الأردنية، محمد شاكر المعروف بـ"شاكر محظور دلوقتي، ومنعه من التصرف فيها بالبيع أو التنازل أو الرهن.
القرارات كمان تضمنت منع محمد محمد عبد العاطي من التصرف في أمواله مؤقتًا، باستثناء مساهماته في الشركات.
قائمة المشاهير طويلة وفيها أسماء كتير
فعندك مثلا التيك توكر مداهم ده بعد القبض عليه اثبتت التحقيقات تورطه في غسل أموال 65 مليون جنيه، باستخدام أرباحه وتحويلها لعقارات وسيارات.
أما سوزي الأردنية فمتهمة بغسل حوالي 15 مليون جنيه عبر شقق سكنية ومحلات تجارية، وشاكر محظور متهم مش بس بغسل أموال، لكن كمان بحيازة سلاح ومخدرات، والتحقيقات لسه بتكشف حجم ثروته.
أحدث المنضمين للقائمة محمد أوتاكا – طليق البلوجر هدير عبد الرازق وده متهم بغسل 12 مليون جنيه من أرباح تيك توك، وضخها في سيارات حديثة وعقارات.
الفائمة بتضم أم مكة – أم سجدة – علياء قمرون: النيابة وجهت لهم اتهامات بتحويل أرباح ضخمة من محتوى غير لائق لمشروعات ظاهرها قانوني لكنها في الحقيقة "غسيل أموال".
واللي اتضبط مع المشاهير دول واللى اتحولوا لمشاهير بين يوم وليلة: سيارات فارهة: مرسيدس، بي إم دبليو، وسيارات دفع رباعي، وشقق سكنية ومحلات في مناطق راقية زي التجمع والشيخ زايد، ده غير أرصدة بنكية بملايين الجنيهات تم التحفظ عليها لحين انتهاء التحقيقات.
طب العملية دي بتم إزاي؟
البداية من لايفات على تيك توك، فيها هدايا افتراضية زي "الأسد" اللي سعره يوصل لـ 400 دولار، الهدايا دي بتتبعت من حسابات مجهولة الهوية، وبيرجع جزء من قيمتها "نقدًا" بعد المرور على وسطاء.
الفلوس دي بتدخل البنوك بشكل طبيعي على إنها أرباح شرعية، ودي أخطر طريقة لغسيل الأموال في العصر الرقمي.
الملف ده ما اتكشفش لما الداخلية استخدمت أدوات متطورة في التحليل الرقمي ورصد البيانات، وتم تتبع حركة التحويلات المالية المرتبطة بحسابات مشاهير التيك توك، ومطابقتها مع أنشطتهم على المنصات.
اللي لفت الانتباه إن فيه حسابات مجهولة كانت بتبعت هدايا بمبالغ ضخمة، وبعد أيام نفس المبالغ بتظهر في صورة تحويلات بنكية أو شراء سيارات وعقارات.
الخيوط دي هي اللي كشفت شبكة غسيل الأموال، وأثبتت إن السوشيال ميديا بقت ساحة جديدة للجريمة المنظمة، محتاجة متابعة لحظة بلحظة.
دخول أموال بالشكل ده بيهدد الاقتصاد الوطني وبيخلق كيانات وهمية في السوق، والخبراء الأمنيون وصفوا الأموال دي بأنها "الوقود الخفي للشبكات الإجرامية".
في أقل من شهر، الداخلية ضبطت أكتر من 500 مليون جنيه ناتجة عن غسيل أموال عبر منصات التواصل، من بينها 215 مليون جنيه لصناع المحتوي.
القصة مش بس قضية جنائية.. دي جرس إنذار للمجتمع كله.. مش كل تريند بريء، ومش كل فلوس جاية من التيك توك نظيفة.
نجوم السوشيال اللي كانوا بيلاحقوا الشهرة بقى اسمهم النهاردة في ملفات غسيل أموال.. واللي حصل معاهم رسالة لكل واحد بيدور على الثراء السريع. الشهرة ممكن تديك فلوس.. لكن الطريق الغلط نهايته السجن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
