يا ترى البنك المركزي هيعملها يوم 28 أغسطس ويخفض الفايدة، طب ليه أغلب التوقعات بتقول إن ممكن يخفض 200 نقطة أساس، وإيه السبب واشمعنى دلوقتي بالذات؟
في الحقيقة، كلنا منتظرين قرار البنك المركزي يوم الخميس الجاي، واللي بالتأكيد هيأثر بشكل مباشر على المواطن البسيط ومش بس كده لأ ده كمان هيأثر على الاستثمار والتضخم وحتى جيب الناس.
عشان كده أغلب التوقعات رايحة على إن البنك المركزي هيتجه لخفض الفايدة 200 نقطة أساس، وده لأسباب كتيرة أهمها التطورات الأخيرة في الاقتصاد المصري اللي بقت أوضح شوية، وكمان الاستقرار في الظروف الخارجية.
والدليل على الكلام ده إن الجنيه المصري اللي ارتفع حوالي 5% من بداية السنة والدولار دلوقتي بقى في حدود 48.6 جنيه، وكمان مؤشر مخاطر الائتمان لمصر نزل من 379 ل267 نقطة أساس، غير كده تحويلات المصريين بالخارج زادت 17% وسجلت 3.4 مليار دولار في شهر مايو اللي مات.
وفوق كل ده، الاحتياطي النقدي عندنا وصل 49 مليار دولار في شهر يوليو، وده رقم كويس جدا جدا.
كمان في إشارات إيجابية عن الاقتصاد المصري، يعني عندك مؤشر مديري المشتريات طلع ل49.5 في يوليو مقابل 48.8 في يونيو، والقطاع الخدمي تحديدا كان السبب، والحكومة كمان أجلت زيادة أسعار الكهرباء والغاز وده خفف الضغوط على الناس وعلى القطاع الصناعي، أما بقى لو جينا لأدوات الدين الحكومية، فهي لسه جذابة وده واضح في عوايد أذون الخزانة اللي بتغطي التضخم المتوقع.
واللي بيأكد اتجاه الخفض إن في 5 أسباب أساسية زي ما قولنا، زي مثالا التضخم بقى يتباطأ الشهرين اللي فاتوا، وكمان الاقتصاد محتاج دفعة نمو، ده بجانب إن الوضع الخارجي مستقر نسبيا، وفي ارتفاع في قيمة الجنيه، وأخيرا أدوات الدين لسه جاذبة حتى مع احتمال الخفض.
ولو ماتعرفش، فالبنك المركزي في اجتماعه اللي فات يوم 10 يوليو ثبت الفايدة على 24% للإيداع و25% للإقراض، وده بعد ما كان خفض 325 نقطة أساس في نص السنة.
والقرار المرة دي مهم جدا للمستثمرين الأجانب خاصة إنهم بيراقبوا السوق المصري وعايزين يعرفوا اتجاه العائد الحقيقي بعد خصم التضخم، يعني أي خفض محسوب للفايدة ممكن يشجع استثمارات جديدة في البورصة والقطاعات الإنتاجية بدل الاعتماد على الدين الحكومي بس.
ومن ناحية تانية، المواطن العادي متابع القصة دي بردو لأن أسعار الفايدة بتنعكس على القروض والتمويل العقاري وأقساط العربيات وحتى الشهادات البنكية، يعني أي تغيير في سياسة المركزي بيأثر بشكل مباشر على حياة الناس اليومية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
