كشف الإعلامي أحمد شوبير حارس مرمى النادي الأهلي ومنتخب مصر الأسبق، آخر مستجدات مصير المهاجم الفرنسي أنتوني موديست مع النادي الأهلي، وموقف السويسري مارسيل كولر المدير الفني للفريق من اللاعب.
شوبير يكشف مستجدات مصير موديست مع الأهلي بعد جلسة الخطيب وكولر
وقال شوبير في برنامجه «مع شوبير»، المُذاع عبر «أون سبورت إف أم»: «زي ما إنتو عارفين إن عقد موديست مع الأهلي بينتهي في 30 يونيو الجاري، وكان فيه مقترح إن اللاعب يقعد الشهرين الباقيين من الموسم وياخد مرتب الشهرين، بس ياخد في الشهر مبلغ وقدره».
وأضاف: «حصل اجتماع بين الكابتن محمود الخطيب رئيس النادي الأهلي ومارسيل كولر لحسم مصير موديست، والخطيب أكد لكولر أن اللاعب بيتقاضى راتب كبير ومفيش استفادة ومعنديش قدرة إن اللاعب ياخد 130 ألف دولار في الشهر».
وتابع: «لجنة التخطيط قالت إن لو موديست هيكمل معانا وياخد مكافآته حاجة كويسة مش بطالة معندناش مانع.. ولسة منتظرين رد وكيله، خاصة إنه معندوش عروض، تقريبا عرض واحد من الدوري الألماني الدرجة الثانية واللاعب عيلته عايشين في ألمانيا».
واختتم شوبير: «الرد هيكون خلال يومين تلاتة، وكولر مصمم على بقاء اللاعب خصوصا إنه عنده وسام أبو علي مصاب معظم الوقت ومعندوش غير كهربا، وبوجه لمستر كولر رسالة وبقوله بص على لاعب اسمه حمزة عبد الكريم في الناشئين هيكون ولد كويس».
