يا ترى هي ليه أوروبا فتحت أسواقها قدام المنتجات المصرية، وإيه المكاسب اللي ممكن ناخدها من الموضوع ده؟
الأيام دي، في خبر حلو جاي من بره، أوروبا بدأت فعلا تفتح أبوابها للصادرات المصرية، وبالذات الزراعية والغذائية وكمان الصناعية، وده مش من فراغ، لأ ده في أسباب كبيرة ورا القرار ده.
ونقدر نقول، إن أوروبا بتراجع حساباتها بعد ما الدنيا ولعت في كذا حتة حوالين العالم، وحركة التجارة وسلاسل الإمداد بقت معرضة لأي تهديد أو توقف مفاجئ، عشان كده الأوروبيين قالوا "ليه منخليش مصر شريك أساسي، اهي بلد قريبة ومستقرة وعندها إنتاج زراعي وصناعي محترم".
ومن هنا، بدأوا فعلا يغيروا القوانين ويوفروا تسهيلات للمنتجات المصرية، يعني مثلا البطاطس المصرية اللي كانت بتقابل صعوبات عشان تدخل أوروبا، دلوقتي بقت بتدخل بسهولة بعد تعديل التشريعات، وكمان القيود الجمركية خفّت جامد.
والموضوع مش بس بطاطس، ده فتح كبير للمنتجات المصرية كلها، وده لان الاتحاد الأوروبي شايف إن فيه توافق سياسي واقتصادي مع مصر، وكمان في توجه مشترك ناحية دعم الأمن الغذائي والتكامل الصناعي.
واللي بيحصل دلوقتي هو نتيجة لاستراتيجية اشتغلت عليها الدولة المصرية من سنين، هدفها الأساسي هو اننا نصدر أكتر ونقوي موقف المنتج المصري في العالم، يعني ببساطة، إحنا قدام فرصة ذهبية لازم نمسك فيها بإيدينا وسنانا، والأسواق الأوروبية كانت زمان صعبة ومعقدة، فدلوقتي بقت بتقولنا "اتفضلوا، احنا محتاجينكم".
كمان، شعبة المصدرين شغالة على الموضوع ده، وبتنسق مع رجال الأعمال والمصدرين علشان يجهزوا نفسهم ويدخلوا السوق الأوروبي بقوة.
والنصيحة هنا، لو انت مصدر أو ناوي تدخل المجال ده فلازم تجهز نفسك، وتتعرف على الاشتراطات الأوروبية وتشتغل على جودة منتجك وتغليفه وتسويقه، لان اللي جاي أحسن واللي مش هيستغل الفرصة، هيفوت على نفسه كتير.
والخلاصة، إن أوروبا فتحت الباب والمفتاح في إيدينا، يتني هنقدر نستفيد مش هنقف نتفرج.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
