أعرب كابتن حلمي طولان المدير الفني لمنتخب مصر المشارك في كأس العرب، عن سعادته بعد الفوز اليوم على منتخب تونس في اللقاء الودي الذي جمع بين المنتخبين.
تصريحات حلمي طولان
قال حلمي طولان: “دي أول تجربة للمنتخب الثاني وإحنا متجمعين بقالنا 5 أيام بس، الشوط الأول خصوصًا بان فيه الانضباط والالتزام بكل اللي اتدربنا عليه، مش بنسبة 100% طبعًا، بس كأول تجربة كويس جدًا”.
وتابع عبر برنامج الكرة مع فايق: “أنا بحيي كل اللاعبين، وبالأخص الكبار زي السولية والنني، قمة في الاحترام والأدب والالتزام، فيه أكتر من طريقة للعب، مش لازم ألعب بجناحين، ممكن ألعب باتنين مهاجمين على الأطراف”.
وأكمل: “الحمد لله سجلنا جول النهاردة، وضيعنا كمان فرصتين وطبيعي اتعرضنا لضغط في الشوط التاني، والمنتخب التونسي فريق قوي جدًا وعنده لعيبة محترفين في فرنسا، يعني مش فريق سهل، عشان كده كويس إننا لعبنا الشوط الأول بالأداء ده وظهرنا بشكل مميز”.
وأتم حلمي طولان حديثه: “عن فوز المنتخب الأول على إثيوبيا، أكيد بنبارك لهم، خطوة كويسة الفوز امبارح، وإن شاء الله نكسب بوركينا فاسو، وساعتها كلنا هنسعد جدًا بالوصول لكأس العالم”.
اعتذار عصام الحضري لكابتن حسام حسن
قال عصام الحضري: “إحنا منظومة واحدة وإحنا منتخب واحد، إحنا كجهاز فني ولاعيبة كلنا داعمين للمنتخب الأول طبعًا بقيادة الكابتن حلمي وطبعًا الكابتن حسام حسن”.
وتابع عبر قناة أون: “زي ما قلت لك يا كابتن، مش عيب إن أنت تعتذر وتقول إن في سوء فهم حصل، في سوء فهم حصل في الفيديو، أنا طول عمري وكابتن أحمد حسن طول عمرنا بنقعد نتكلم ونهزر مع بعض، مش عايز أقول بعض الناس ممكن ده سوء فهم، الناس فهمت إن احنا بنتكلم على حاجة أو لأ”.
