أكد الإعلامي مصطفى بكري أن الموقف المصري من تهجير الفلسطينيين واضح وغير قابل للتغيير، مشيرا إلى أن مصر لن تشارك في التهجير ولن تسمح به.
وقال بكري خلال برنامج "حقائق واسرار" المذاع على قناة "صدى البلد": "أي حد بيقرأ الخريطة كويس وبيتابع الأحوال وبيتابع الأخبار وبيشوف التطورات وبيشوف الخيانات وبيشوف المؤامرات يحس إن احتمالات اشتعال المنطقة بتزيد".
وأضاف: "إسرائيل ومن خلفها أمريكا الاثنين بيواصلوا الخطة بتاعتهم بتاعه التهجير اللي اتكلمنا عنها قبل كده 1000 مرة وبعدين بيحطوا وهم بيتكلموا مع التهجير خطة إسرائيل الكبرى الكلام ده مش تكهنات ولا توقعات دي يا جماعة استراتيجية بتتنفذ على أرض الواقع زي ما أنتم شايفين".
وتابع: "امبارح نتنياهو بيخرج وبيقول علنا وعين عينك احنا عندنا خطط لإعادة تأهيل غزة ونص سكانها يريدوا مغادرتها وأن مغادرة غزة حق أساسي لكل فلسطيني وقال إنه مستعد لفتح معبر رفح للفلسطينيين لكن مصر ستغلقه فورا يا سلام".
وأكمل: "يعني أنا هفتح لكم المعبر عشان تهجروا بس مصر هتمنع يا عيني الهجرة دي هيمنعوا التهجير وبكده يا إنسان أنت اللي خايف على الفلسطينيين وعايز تهجرهم سعادتك لأن في قوة بتضربهم عشان أنت طبعا لا في قوة أخرى بتضربهم بتدمرهم فأنت مستعد تفتح المعبر بس مصر هتغلقه على وجه السرعة".
وواصل: "طبعا وزارة الخارجية المصرية ردت على هذا الهذيان وعملت بيان رسم النهاردة وقالت فيه إن مصر بتدين وبترفض تهجير الشعب الفلسطيني وأن هذا الرفض سواء تحت أي مسمى سواء تهجير قسري أو طوعي أو الكلام اللي بيقولوه اليومين دول".
وواصل: "البيان أكد أنه اللي بيحصل ده من خلال استهداف المدنيين والبنية التحتية المدنية ومناحي الحياة المختلفة هدفه إجبار الفلسطينيين على المغادرة البيان بتاع الخارجية النهاردة أعاد التأكيد أن مصر لن تكون أبدا شريكا في هذا الظلم من خلال تصفيه القضية الفلسطينية أو أنها تصبح بوابة للتهجير".
واختتم: "هو ده الموقف ومش أنا ما بخاطبش الخونة ولا ببرر مواقفنا ولا بقول للمتآمرين هو ده مواقفنا لا احنا ما يهمناش حد احنا بنقول ده مواقفنا وثوابتنا الأساسية زي ما قالت الخارجية المصرية ده هيفضل خط أحمر غير قابل للتغير قرار نهائي".
