منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن أقوى 40 دولة عالميا من حيث القدرة الشمسية المركبة.
قال التقرير، إن العالم كله داخل على مرحلة جديدة، مرحلة اسمها الطاقة الشمسية، لأنها مبقتش بديل، ده بقى واقع بيجبر العالم يعيد حساباته.. والصين هي البطل الأول في القصة دي مش مجرد منافس، لأنها بتغير الخريطة كلها، ووصلوا لـ1100 جيجاوات قدرة مركبة، وبينتجوا أكتر من 834 تيراوات ساعة! ومعدل نمو 45% في سنة واحدة بس.
وأوضح التقرير، أن أمريكا بتيجي بعد الصين، عندها 239 جيجاوات، ونمو حوالي 27%، ووراها الهند في المركز التالت بـ107 جيجاوات، والسر هناك كان في انخفاض الأسعار والدعم الحكومي.. أما أوروبا، الصورة متباينة، ألمانيا في المركز الخامس بـ89 جيجاوات، وإسبانيا، أستراليا، هولندا.. كلهم موجودين، لكن المفاجأة كانت تركيا، نمو 76% في سنة واحدة بس!
نيجي بقى للعالم العربي، الإمارات متصدرة بـ6 جيجاوات تقريبا، ومعاها مشروع ضخم زي مجمع محمد بن راشد، أما مصر في المركز 38 بـ2.6 جيجاوات، ومعتمدة على مجمع بنبان الشمسي اللي يُعتبر واحد من أكبر مجمعات إفريقيا.
منصات بانكير قدمت تقرير مختلف النهاردة عن أسرار قرارات الحكومة برفض زيادة أسعار الكهرباء.
قال التقرير، إن الحكومة الفترة اللي فاتت أعلنت قرار مهم جدًا يخص أسعار الكهرباء، واللي كان الكل مستني يعرف مصيره، إحنا متعودين إن مع بداية كل سنة مالية بيكون في زيادات جديدة على خدمات كتير، ومن ضمنها الكهرباء اللي الدولة رفعت أسعارها أكتر من مرة ضمن خطة رفع الدعم.
وأضاف تقرير بانكير، أن رئيس الوزراء مصطفى مدبولي أكد بشكل واضح إن مفيش أي زيادة حالية في أسعار شرائح الكهرباء، وإن الدولة مش ناوية ترفع الأسعار دلوقتي، السبب الرئيسي للقرار ده هو إن الحكومة عايزة تراعي الفئات الأولى بالرعاية، وتحافظ على استقرار التضخم اللي بيأثر على حياة الناس اليومية.
القصة إن جهاز تنظيم مرفق الكهرباء كان بالفعل جهز خطة جديدة للتسعير، ورفعها لوزارة الكهرباء اللي بدورها عرضتها على مجلس الوزراء، واللي بتقترح زيادات بين 15% و25% للشرائح الأولى، وتوصل لـ45% للشريحة السابعة اللي أصلا خارج الدعم، وأن السبب الأساسي لطلب الزيادة هو ارتفاع تكاليف التشغيل سواء من غاز طبيعي أو مازوت أو مستلزمات بالدولار.
وأوضح التقرير، أن الدولة قررت تأجيل التنفيذ، ورفعت الدعم المخصص للكهرباء لـ75 مليار جنيه في الموازنة الجديدة علشان تتحمل الفجوة دي وتخفف العبء عن المواطنين.
وحدة أبحاث بانكير قدمت تقرير خاص النهاردة عن فاتورة كماليات السيارات من الخارج.
قال التقرير، إن الصناعة بقت محور أساسي في خطط الحكومة الفترة دي، خصوصًا الصناعات اللي عليها طلب كبير في السوق المصري، ومن أهمها صناعة العربيات وكمالياتها.. لأننا لسنين طويلة كنا بنستورد حاجات كتير جدًا من بره، رغم إنها ممكن تتصنع عندنا بسهولة، علشان كده الدولة ركزت على جذب شركات كبيرة لصناعة العربيات محليًا بجودة عالية، مش بس علشان تلبية السوق المحلي لكن كمان علشان ننافس بره ونفتح باب للتصدير.
وأوضح تقرير بانكير، أن الحكومة ماوقفتش عند تجميع العربيات وبس، لا، راحت كمان لتوطين الصناعات المكملة زي الكاوتش والضفائر الكهربائية وغيرها من الكماليات اللي عليها طلب ضخم سواء للصيانة أو للتصنيع، وده ظهر في شراكة الحكومة مع القطاع الخاص، زي ما حصل مع شركة سوميتومو اللي بدأت مشروعها في العاشر من رمضان لمصنع ضخم بينتج ضفائر إلكترونية لحد مليون عربية في السنة، وهيفتح آلاف فرص عمل للشباب بشكل مباشر وغير مباشر، وكمان هيزود صادراتنا من الكماليات اللي العالم كله محتاجها.
وأشار تقرير بانكير إلى أن فيه كمان مصنع إنتاج إطارات العربيات في السخنة باستثمارات تقارب مليار يورو، هيصنع 7 مليون إطار سنويًا، ويوفر لمصر مليارات كانت بتتصرف على الاستيراد، بجانب إن منتجاته هتدخل أسواق بره زي ما حصل مع مصنع بيراميدز اللي بقى علامة مصرية عالمية.. ولازم نفتكر إعادة إحياء مصنع النصر للسيارات اللي كان شبه ميت، واللي بدأ من 2024 يجمع أتوبيسات كهربائية بطاقة 300 أتوبيس سنويًا، ومع خطط للتوسع لحد 1500 أتوبيس، وكمان عنده طلبيات للتصدير.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
