يا ترى العلمين الجديدة هتبقى إزاي بعد 6 سنين لما مصر تعمل أضخم مشروع سكني هناك؟، وهل الكمبوند ده هيغير شكل الساحل الشمالي ويخليه أرقى من اللي موجود دلوقتي؟.. وهل السعر المعلن للمتر 5340 جنيه يعتبر فرصة استثمارية، ولا لسه ممكن يزيد أكتر الفترة الجاية؟
تخيل معايا إنك واقف على ساحل البحر المتوسط، في قلب العلمين الجديدة، وبتتفرج على مشروع عمراني ضخم بيتكلم عنه الكل اليومين دول، وزارة الإسكان أعلنت عن طرح كمبوند فاخر متكامل على مساحة ضخمة جدًا بتوصل لـ 502 ألف متر مربع، يعني تقريبًا ما يعادل من 50 لـ200 فدان، والمشروع ده قيمته الإجمالية وصلت لـ 2.6 مليار جنيه.
المشروع متخطط يبقى كومباوند كامل الخدمات، مش مجرد عمارات أو فيلات وخلاص، لا.. إحنا بنتكلم عن مكان متكامل جنب الأكاديمية العربية للعلوم والتكنولوجيا والنقل البحري، يعني موقع استراتيجي في قلب العلمين الجديدة.
نرجع شوية للتفاصيل، عشان دي اللي بتهم المستثمرين واللي ناويين يدخلوا في الطرح، سعر المتر الواحد معمول بـ5340 جنيه، وده السعر الرسمي اللي أعلنت عنه الوزارة، بس الأهم من كده إن فيه اشتراطات بناء صارمة، عشان المشروع يفضل محافظ على الشكل الحضاري والفخامة اللي متخطط لها.
بس إيه هي الاشتراطات دي اللي لازم الكل يلتزم بيها، أولا أراضي الإسكان ما ينفعش تزيد عن 50% من مساحة الأرض، وأراضي الخدمات ما ينفعش تتخطى 12%، أما بالنسبة للعمارات، نسبة البناء مسموح بيها لحد 50% من الأراضي المخصصة للإسكان.
أما الفيلات المنفصلة فالنسبة 40%، ولو توين أو تاون هاوس أو كواترو، يبقى الحد الأقصى 45%، ده كمان الارتفاعات برضه محسوبة: العمارات (أرضي + 4 أدوار)، والفيلات (أرضي + أول).، أما أراضي الخدمات نسبتها ما تعديش 30%، والارتفاع أرضي + دورين.
يعني باختصار، التصميم كله معمول بحيث يحافظ على الطابع الراقي والمفتوح، بعيد عن الزحمة أو التكدس.
المشروع قدامه 6 سنين تنفيذ، تبدأ من أول قرار وزاري يعتمد التخطيط والتقسيم، أما بالنسبة للسداد، الموضوع متقسم على 12 قسط نصف سنوي متساوي، يعني دفع مريح على مدار 6 سنين، فيه طبعًا دفعة مقدمة 10% (5% مدفوعة بالفعل و5% بتدفع خلال شهر من الموافقة)، وكمان مصاريف إدارية ومجلس أمناء، بعد كده بقى الأقساط بتتحمل بالفوايد المقررة من البنك المركزي + 2% زيادة حسب تعليمات وزارة المالية.
الموضوع مش مجرد بيع أرض، لا، ده مشروع معمول عشان يبقى أيقونة جديدة على ساحل البحر المتوسط، العلمين الجديدة بقت عنوان للفخامة والمستقبل، والمشروع ده هيبقى جزء أساسي من الصورة دي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
