البنك المركزي مكمل في قراراته لخفض أسعار الفائدة وواضح أنه مكمل علي كده فترة طويلة.. ياتري اية سر اهتمام البنك المركزي بخفض أسعار الفائدة.. وهل هيجي اليوم اللي الناس تحط فلوس عايز تحافظ علي أرصدتها في البنوك.
2025 بتختلف عن كل السنين اللي فاتت خصوصا في النواحي المتعلقة بالاقتصاد خصوصا انها شهدت لاول مرة قرارات لخفض أسعار الفائدة للمرة الثالثة خلال 4 اجتماعات للجنة السياسات النقدية، القرار الأول منهم كان في ابريل لما اللجنة أقرت خفض أسعار الفائدة بنسبة 200 نقطة أساس وبعدها جه قرار مايو والبنك المركزى قرر خفض أسعار الفائدة بنسبة 100 نقطة أساس، واخيرا جه قرار اغسطس والبنك المركزي من جديد قرار تخفيض اسعار الفائدة.
طبعا بعد كل قرار من دول لخفض أسعار الفائدة كل الناس بتسأل عن السبب اللي خلي البنك المركزي يأخذ قرارات لخفض أسعار الفائدة بعد الفترات اللي فاتت واللي كانت كلها عبارة عن قرارات اما برفع أسعار الفائدة أو تثبيتها، وليه البنك المركزي أخذ القرار في التوقيت ده بالذات لخفض أسعار الفائدة.. واية الفائدة اللي بترجع علي الاقتصاد المصري من قرارات خفض أسعار الفائدة.
طيب اية الأسباب اللي خلت البنك المركزي يخفض اسعار الفائدة في التوقيت ده؟.
في أكثر من سبب ده عبارة عن دافع مهم للبنك المركزي علشان ياخد قرارات خفض أسعار الفائدة أولهم تراجع التضخم السنوي من14.9% في يونيو إلى 13.9% في يوليو 2025، ده غير أن التضخم الشهري تراجع بالسالب،. ده بيدل علي استمرار مسار الانخفاض.
في سبب مهم كمان كان له دور مهم في قرارات البنك المركزي بخفض أسعار الفائدة وهو التعافي المستمر في الناتج المحلي الإجمالي بمعدل إيجابي خصوصا الأرقام اللي حققها الاقتصاد المصري في الربع الثاني من 2025، وده بدعم كبير من قطاعات الصناعة غير البترولية والسياحة، ده غير التوقعات اللي موجودة عن التحسن في خفض معدلات التضخم خلال الوقت اللي جاي خصوصا في ظل تطبيق سياسة مالية متوازنة من جانب الحكومة.
في حاجة مهمة كمان كانت هيا السبب في قرارات خفض أسعار الفائدة هيا النزول المستمر الأسعار في السوق المصري، وده كان حافز مهم جدا للبنك المركزي علشان يأخذ القرار ده خصوصا أن البنك بيشوف إن مفيش داعي يفضل محافظ على الفائدة العالية، وهنا بياخذ قرار أن يقللها علشان يشجع الناس والشركات على الاقتراض والاستثمار، ده غير أن البنك المركزي عايز يشجع الاقتصاد خصوصا ان الفايدة لما تبقى عالية، فالناس بتسيب فلوسها في البنوك ومبتصرفش كتير، فبيقل الطلب في السوق، لكن لو الفايدة انخفضت، الاقتراض بيزيد والناس بتصرف أكتر، وده بيحرك عجلة الاقتصاد.
الاستقرار اللي حل في الفترة اللي فاتت في سعر صرف الجنية المصري واللي مستمر نت قارة طويلة قدام الدولار، وده خلي البنك المركزي أنه يكون مطمئن أكتر إنه يقلل الفايدة من غير ما يحصل هروب لرؤوس الأموال للأسواق المنافسة أو ضغط على العملة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
