رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قرار مهم للبنك الأهلي وبنك مصر، وأرقام قياسية لصادرات الصناعات الغذائية، وطرح أراض جديدة للبيع.
نبدأ بالبنوك.. البنك الأهلي المصري وبنك مصر قرروا يقللوا الفايدة على شوية شهادات وحسابات اللي الفايدة بتاعتها بتتغير.. ونزلوها بـ 2%.. الخطوة دي جت بعد ما البنك المركزي كان قلل الفايدة يوم الخميس اللي فات بـ 2% برضه.. وبكده بقت فايدة الإيداع 22% وفايدة القروض 23%..
البنك الأهلي.. أكبر بنك حكومي في مصر.. نزل الفايدة على الشهادة البلاتينية اللي مدتها 3 سنين وبتتغير فايدتها.. وبقت الفايدة عليها 22.25%.. أما بنك مصر.. تاني أكبر بنك حكومي.. فقلل الفايدة على كل حسابات "سوبر كاش جاري" اللي فايدتها بتتحسب كل يوم.. وأعلى فايدة عليها بقت 16.5% بدل 18.5%.. ده للشريحة اللي معاها أكتر من 30 مليون جنيه.. وأقل فايدة على نفس الحسابات بقت 9.75% بعد ما كانت 11.75%.. وده للحسابات اللي فيها من 100 ألف لـ 500 ألف جنيه.. وكمان نزل فايدة الحساب الجاري بتاع أصحاب المعاشات لـ 16.75% بدل 18.75%.. وشهادة يوماتي اللي فايدتها بتتغير كل يوم بقت 21.75% بدل 23.75%.
نيجي للخبر الحلو التاني.. صادرات قطاع الصناعات الغذائية في أول 6 شهور من 2025 حققت أرقام تاريخية.. ووصلت لـ 4.03 مليار دولار.. يعني زادت 8% عن نفس الفترة من 2024.. واللي كانت فيها 3.738 مليار دولار.. ودي أعلى قيمة للقطاع في التاريخ..
رئيس المجلس التصديري للصناعات الغذائية.. محمود بزان.. قال إن الدول العربية هي أكتر ناس بتشتري مننا.. وخدت 47% من إجمالي الصادرات بقيمة 1.893 مليار دولار.. بعدها الاتحاد الأوروبي بـ 870 مليون دولار.. بزيادة 8%.. وبعدين الدول الإفريقية اللي مش عربية بـ 298 مليون دولار.. بزيادة 5%.. وأمريكا بـ 274 مليون دولار.. بزيادة 47%.. وباقي الدول خدت بـ 694 مليون دولار.
ونروح لووزارة الإسكان اللى أعلنت إنها هتنزل بكرة كراسة شروط لـ 2333 قطعة أرض سكنية جديدة للمستوى المتوسط والمميز والأعلى تميزاً.. وده الطرح السادس من مشروع "مسكن".. الحجز هيبدأ يوم الأحد 14 سبتمبر 2025 وهيفضل لمدة شهرين لحد 13 نوفمبر.. الحجز كله هيكون من خلال الموقع الإلكتروني "مسكن".. الوزارة قالت إن ده بيجي تنفيذاً لتعليمات الرئيس عبد الفتاح السيسي عشان توفر أراضي سكنية للمواطنين.. الأراضي هتكون في 18 مدينة جديدة زي 6 أكتوبر.. والعبور.. والعاشر من رمضان.. وغيرها كتير.
وختامها مسك مع صادرات الملابس الجاهزة المصرية اللي عملت طفرة كبيرة في أول 7 شهور من 2025.. ووصلت لـ 1.939 مليار دولار.. مقارنة بـ 1.539 مليار دولار في نفس الفترة من السنة اللي فاتت.. يعني زادت 26%..
المهندس فاضل مرزوق.. رئيس المجلس التصديري.. قال إن الزيادة دي هتتضاعف أكتر من أغسطس 2025.. وممكن توصل لـ 35%.. وده بسبب الدعم الكبير اللي بيقدمه المجلس للشركات.. ومجهودات جذب الاستثمارات الأجنبية الجديدة من الصين وتركيا.. هو كمان حط هدف كبير للقطاع وهو إنه يوصل لـ 12 مليار دولار بحلول 2031.. من خلال خطة عشان يزود قدرة المنتج المصري على المنافسة.. ويشجع الشركات الصغيرة والمتوسطة إنها تصدر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
