ملف الطاقة واحد من الملفات اللي خلال الفترة اللي فاتت استنزفت ارقام كبيرة من ايرادات مصر الدولارية وكان لازم الحكومة تحط حد للأزمة دي وتوقف نزيف استهلاك الدولار .. ياتري الحكومة عاجلت الأزمة دي أزاي.. واية خطة الحكومة للتعامل مع ملف الطاقة.
تأمين الطاقة واحد من الملفات اللي كانت عاملة أزمة كبيرة جدا للحكومة خلال السنين اللي فاتت بسبب النقص اللي حصل في انتاج البترول واللي اثر علي الامدادات الخاصة بمحطات توليد الكهرباء واللي توقف اغلبها عن العمل بسبب قله البنزين والسولار والغاز الطبيعي المطلوب للتشغيل، والنقص ده خلي الحكومة تلجأ لتطبيق خطة لتخفيف الأحمال واللي بدأت بقطع الكهرباء لمدة ساعة وبعدين وصلت لساعتين واحيانا وصلت لـ 3 ساعات.
الأزمة اللي حصلت في ملف الكهرباء دفعت الحكومة لتوفير وتدبير حلول بديلة لأنهاء الأزمة والتغلب علي أزمة قطع الكهرباء في مصر خصوصا أن الأزمة دي كانت بتعم علي الشعب المصري كله، وحلها هو توفير المواد البترولية اللازمة لتشغيل محطات التوليد وبسبب النقص في الإنتااج المحلي في المواد البترولية فالدولة لجأ للاستيراد وخصصت مبالغ مالية كبيرة لتوفير المواد البترولية المطلوبة.
المبالغ الدولارية اللي الدولة وفرتها لاستيراد المواد البترولية من الخارج عملت تحميل اضافي علي ميزانية الدولة، خصوصا أنها جت في وقت الدولة كان عنها شح نسبي في الدولار، وكان لازم يكون في معالجة للازمة بتوفير موارد بديلة لتوليد الكهرباء بعيدة عن استيراد البترول والغاز الطبيعي من الخارج.
طيب ازاي الدولة هتحل أزمة نقص مصادر الطاقة استعدادا لفصل الصيف.
الدولة في الفترة الحالية فتحت باب مشاركة القطاع الخاص للدخول ومشاركة الحكومة في بناء وتشغيل محطات توليد الكهرباء من مصادر الطاقة الجديدة والمتجددة واللي هيا الشمس والهواء، خصوصا أن مصر عندها تجارب نجاحة لتوليد الكهرباء من الرياح والشمس اهمهم محطة بنبان للطاقة الشمسية في أسوان، وقدمت تسهيلات كبيرة لشركات القطاع الخاص للدخول لمصر والاستثمار في الطاقة النظيفة.
التسهيلات اللي قدمتها الحكومة لدخول القطاع الخاص واللي كانت عبارة عن تسهيلات كبيرة في الحصول علي الأراضي المطلوبة لبناء محطات التوليد، ده العقود اللي وقعتها الدولة مع المستثمرين لشراء الطاقة اللي هتنتجها المحطات خلت عدد كبير من كبري الشركات العالمية عندها هدف انها تدخل السوق المصري وتشارك في توليد الكهرباء، وحاليا الحكومة بتستهدف توليد 4 الاف ميجاوات من الطاقات الجديدة والمتجددة هتدخل علي الشبكة الموحدة للكهرباء استعدادا لفصل الصيف خصوصا أن الحكومة أكدت التزامها بعدم العودة لتطبيق خطة تخفيف الأحمال خلال شهور الطيف.
التعاقدات اللي وقعتها الحكومة مع شركات القطاع الخاص لتوليد الكهرباء من الهواء والشمس هتوفر لمصر مبالغ دولارية كبيرة كانت الدولة بتخصصها لاستيراد البترول والغاز الطبيعي وهيوصل معدل التوفير اليومي لمصر لأكثر من 500 مليون و800 الف جنية يوميا كانت الدولة بتصرفهم في شراء الغاز الطبيعي لتشغيل محطات توليد الكهرباء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
