هو إيه اللي بيحصل في سوق الدهب بالظبط؟ وليه الأسعار رجعت ترتفع بقوة؟ وإيه اللي خلّى الدهب عالميًا يزيد تاني؟ والأهم ليه الجرام عندنا في مصر قفز كده في آخر يومين؟ لو عايز تعرف إيه السبب ورا الزيادة دي .. وهل الأسعار هتفضل ترتفع ولا هتنزل قريب .. خليك معانا للآخر وهنشرحلك كل حاجة .. وهنقولك إيه اللي ممكن يحصل في الفترة الجاية.
الدهب مش بس إكسسوارب نلبسه .. ده استثمار الناس بتشتريه لما الوضع في السوق يبقى غير مستقر .. وفي الفترة الأخيرة .. أسعار الذهب عالميًا زادت جدًا .. الأونصة وصلت في أوائل مايو 2025 لحوالي 3300 دولار .. يعني زيادة حوالي 17% من بداية السنة.
طب إيه اللي حصل؟
أول حاجة .. فيه توترات بين أمريكا والصين بسبب التجارة .. أمريكا زودت الرسوم الجمركية والصين ردت بزيادة مماثلة على البضايع الأمريكية.. وده خلّى المستثمرين يشتروا ذهب عشان يحموا فلوسهم .. ثاني حاجة .. التضخم في العالم لسه مرتفع .. البنوك المركزية زي الفيدرالي الأمريكي بتحاول تتحكم في الفايدة .. بس التضخم لسه موجود .. والدهب بيزيد في الحالة دي .. تالت حاجة .. الدولار لما بينخفض .. الذهب بيرتفع .. وده حصل في الفترة الأخيرة
طب في مصر ليه الأسعار زادت في آخر 48 ساعة؟
عيار 21 .. اللي هو الأشهر عندنا .. وصل حاليا لحوالي 4800 جنيه للجرام .. رقم كبير جدًا مقارنة بالأسعار قبل كده .. السبب الأول إن أسعارنا بتتحرك مع الأسعار العالمية .. الأونصة لما بترتفع بره .. الجرام عندنا بيزيد .. بس كمان فيه سبب تاني .. وهو الدولار في السوق المحلي .. رغم إن الدولار كان شبه مستقر .. بس الناس اشترت دهب كتير جدًا عشان فيه ناس خايفة على فلوسها .. بيحبوا يستثمروا فيه بدل الفلوس الورقية اللي ممكن قيمتها تنزل.
كمان فيه أسباب تانية في مصر .. زي إن الناس بتشتري دهب كتير قبل الأعياد والمناسبات .. زي ما حصل قبل عيد الفطر اللى فات .. وفي آخر يومين .. الناس زادت الشراء عشان خايفة الأسعار ترتفع أكتر .. وده خلّى الأسعار تزيد بسرعة.
طب الأسعار هتروح فين الفترة الجاية ؟
الخبراء بيقولوا إن الدهب ممكن يفضل يزيد لو التوترات بين الدول زادت .. يعني لو المشاكل التجارية بين أمريكا والصين استمرت .. أو لو التضخم في العالم ما نقصش .. فيه توقعات إن الأونصة ممكن توصل 3600 دولار قبل نهاية 2025 .. بس لو البنوك المركزية نجحت تتحكم في التضخم .. أو الدولار زاد تاني .. الذهب ممكن ينخفض شوية .. في مصر .. الأسعار هتفضل تتحرك مع السوق العالمي .. بس لو الناس اشترت دهب أكتر زي دلوقتي .. الأسعار ممكن تزيد تاني.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
