مشروعات عملاقة واستثمارات ضخمة وصناعات لأول مرة.. مصر رايحة فين (فيديو)

إيه اللي بيحصل في مصر دلوقتي.. وازاي خريطة الصناعة والاقتصاد بتتغير كل يوم.. وايه المفاجآت الجاية في الملفات الاقتصادية المختلفة.. 

نقدر نقول إن مصر اليومين دول بتعيش مرحلة مفترق طرق ونقطة تحول كبيرة في الملفات الاقتصادية والمالية والإدارية والاجتماعية والتجارية ودا لأن البلد خلاص خدت طريق الانتاج والتصنيع والتصدير والتطور والنمو المستمر للوصول إلي نتائج سبق التخطيط ليها يعني كل خطوة وكل إنجاز بيحصل في مصر دلوقتي مش صدفة لكن نتيجة تخطيط دقيق وجداول زمنية معروفة..

ملف توطين الصناعة من أهم الملفات اللي مصر بتعتمد عليها عشان نتخلص من الاستيراد من ناحية.. ومن الناحية التانية توفير المنتج المحلي والتصدير للخارج وخلق موارد دولارية جديدة للبلد .. واتكلمنا كتير على ملف الصناعة وقلنا إنه الخل السحري المضمون لاي نهضة اقتصادية لأن مفيش اقتصاد بدون إنتاج وتصدير ..

ولو تابعنا على مدار الأيام اللي فاتت اللي بيحصل في قطاع الصناعة هتعرف إزاي مصر بتجري في الملف دا وحققت نتائج عظيمة وكل يوم بنسمع عن إنشاء مصانع جديدة باستثمارات كبيرة ومنها مثلا في اخر كام يوم توقيع اتفاقية بين الهيئة العربية للتصنيع مه شركة إكسجواي الصينية لإنشاء أول مصنع من نوعه في مصر لإنتاج أجهزة الرنين المغناطيسي والأشعة السينية والمقطعية.. ودي تطور كبير ونوعي لأن الأنواع دي من المنتجات بتعتمد على تكنولوجيا متطورة... وحسب الهيئة العربية للتصنيع إن إنشاء المصنع دا خطوة مهمة  لتوطين التكنولوجيا وزيادة نسب التصنيع المحلي وتقليل الواردات وزيادة القيمة المضافة في مختلف الصناعات وتغطية احتياجات السوق المحلي، وتقليل الاعتماد على الاستيراد، مع فتح آفاق التصدير إلى الأسواق الإقليمية والأفريقية.... وإن الهيئة شغالة على جذب الاستثمارات بالشراكة مع كبرى الشركات العالمية في إطار رؤية مصر للتنمية المستدامة 203..

من المشروعات الصناعية المهمة اللي كانت حديث الأوساط الاقتصادية هو وضع حجر الأساس لإنشاء أضخم مجمع صناعي صيني في مصر، باستثمارات تبلغ 1.6 مليار دولار في المنطقة الاقتصادية لقناة السويس .. بيضم المجمع الجديد 9 مصانع من بينها مصنع لمكونات السيارات ومصنع لقطع غيار السيارات ومصنع لمكونات الأجهزة المنزلية ومصنع لقطع غيار الآلات بخلاف مصنع لإنتاج طنابير الفرامل ومصنع للمسامير والصواميل ومصنع للهياكل الفولاذية ومصنع لإنتاج اللفائف المدرفلة على الساخن بجانب مصنع لإنتاج اللفائف المدرفلة على البارد، ودا بطاقة إنتاجية إجمالية تبلغ 4.8 مليون طن سنويا.

كمان الدكتور مصطفى مدبولي شهد اليومين اللي فاتوا توقيع عقد إنشاء شركتين جديدتين بين الحكومة المصرية وشركة عثمان إنترناشيونال الإماراتية بإجمالي استثمارات 1.7 مليار جنيه... ومن المقرر  الشركتين هتتولي إنشاء مصنعين جديدين في كفر الدوا  لتحويل مخلفات البلاستيك إلى ألياف فايبر بوليستر المُستخدمة في صناعة الملابس الرياضية والسجاد ورصف الطرق وكمان تحويل بواقي الأقمشة إلى لُباد صناعي المُستخدم في صناعات الطائرات والقطارات والمترو.

من المشروعات المهمة جدا اللي تم الإعلان عنها في اليومين اللي فاتوا كان توقيع عقد إنشاء مصنع لإنتاج أكياس وقِرَب جمع الدم، بالتعاون مع العلامة اليابانية الشهيرة “JMS”، باستثمارات 1.4 مليار جنيه..بهدف تلبية احتياجات السوق المحلي بالكامل، مع تصدير نحو 4 ملايين قِرْبة سنويًا إلى الأسواق الخارجية.