إيه اللي ممكن يخلي مستثمر كويتي يسيب كل البلاد وييجي يستثمر في مصر؟ وإزاي مصر بقت عنصر قوي يجذب رؤوس الأموال من دول الخليج؟ .. وإيه قصة الـ52 فرصة اللي هزّت السوق وخلّت الكويتيين يترقبوا كل خطوة؟
مصر مش بس بتفتح أبوابها للمستثمرين .. دي بتقدملهم مفتاح الكنز .. من كام يوم انطلق فى القاهرة الاجتماع المشترك لمجلس التعاون الكويتي المصري .. ومعاه منتدى الاستثمار والأعمال بين البلدين .. الوزير محمد شيمي .. وزير قطاع الأعمال العام .. طلع وقال كلام مهم أكد فيه وجود 52 فرصة استثمارية جاهزة للمستثمرين الكويتيين.
تخيلوا .. 52 فرصة في قطاعات زي السيارات .. الكيماويات .. الغزل والنسيج .. وأكيد برنامج الطروحات الحكومية اللي بيعتبر العمود الفقري للخطة دي.
طب ليه الكويتيين مهتمين أوي كده بالاستثمار فى مصر ؟
ببساطة .. مصر دلوقتي بتقدم مزيج مثالي: استقرار اقتصادي .. سوق ضخم .. وفرص متنوعة .. الطروحات الحكومية دي مش مجرد بيع أسهم .. دي خطة بتفتح الباب للقطاع الخاص عشان يشارك في إدارة أصول الدولة .. يعني بدل ما الحكومة تدير كل حاجة .. بتدي فرصة للمستثمرين يبقوا شركاء في النجاح .. والكويتيين شايفين في ده فرصة ذهبية .. خصوصاً إن برنامج الطروحات بيغطي قطاعات استراتيجية زي البنوك .. الطاقة .. والعقارات.
طب ايه حكاية إدارة وتشغيل المطارات؟
مصر بتخطط تطرح 11 مطار للقطاع الخاص .. من مطار القاهرة الدولي لمطارات زي شرم الشيخ والغردقة .. الكويتيين عينهم على الملف ده زي الصقر .. ليه؟ .. لأن إدارة المطارات مش بس بتجيب فلوس من التشغيل .. دي كمان بتفتح الباب لاستثمارات في السياحة .. اللوجستيات .. وحتى التطوير العقاري حوالين المطارات .. الكويت عارفة كويس إن السوق المصري دلوقتي زي لاعب كورة في عز فورمته .. لازم تستغل الفرصة دي.
وخلينا نفكركم بحاجة .. برنامج الطروحات الحكومية ده مش جديد .. ده من 2022 لما الحكومة أعلنت وثيقة سياسة ملكية الدولة .. وهدفها كان واضح: ندي مساحة أكبر للقطاع الخاص .. نجيب استثمارات أجنبية .. ونخلّي الاقتصاد ينمو بشكل مستدام ..و في 2023 .. البرنامج ده جاب أكتر من 5 مليار دولار من التخارجات في 10 شركات على الأقل .. دلوقتي .. مصر بتستهدف توصل لـ40 مليار دولار على 4 سنين .. والكويت عايزة تكون جزء من القصة دي.
الـ52 فرصة اللى أعلنت عنهم الحكومة مش مجرد أرقام .. دي بوابة لشراكة استراتيجية بين مصر والكويت .. سواء في الصناعة .. الطاقة .. أو إدارة المطارات .. الكويت شايفة إن مصر دلوقتي مش بس سوق واعد .. دي مركز إقليمي للاستثمار .. ومع كل فرصة بتتفتح .. بيظهر أمل جديد لاقتصاد أقوى وشراكة أعمق بين البلدين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
