إيه اللي بيحصل في صناعة الأدوية في مصر ... وليه حصلت قفزة في الإنتاج... وازاي مصر هتسيطر على صناعة الدواء في افريقيا.. وهل أسعار الأدوية هتنزل في السوق المحلي بعد زيادة الإنتاج..
صناعة الأدوية من الصناعات الاستراتيجية في أي دولة وليها بعد أمن قومي كمان واللي بيملك الصناعة دي بيملك قوة خاصة في الأسواق العالمية.. وبنقول على صناعة الأدوية صناعة استراتيجية لأنها صناعة زي صناعة الأسلحة المتقدمة ليها سر صنعة وفيها مليارات الدولارات استثمارات في السنة بتعتمد على البحوث الطبية ومراكز أبحاث متقدمة لكل شركة وفيه منافسة شرسة جدا بين كل الشركات العالمية عشان السبق والاحتكار بين شركات الدواء الشهيرة ..
صناعة الدواء في مصر صناعة قديمة لكن محصلش فيها تطوير نوعي زي ما بيحصل في الدول الأوربية والمتقدمة وعشان كده مصر قررت تغير الواقع دا من فترة وبقي فيه خطط واضحة لزيادة الإنتاج وتوسيع المصانع الحالية وإضافة خطوط إنتاج جديدة وفي نفس الوقت تشجيع القطاع الخاص على المشاركة بقوة في صناعة الدواء المصري وجذب استثمارات أجنبية مباشرة في الصناعة دي لأنها صناعة مكلفة..
الخطة الحكومية نجحت بشكل كبير في مضاعفة الإنتاج والقضاء على ظاهرة نقص الأدوية في الأسواق خلال الفترة اللي فاتت بسبب ارتفاع أسعار المواد الخام عالميا وحاجة بعض الشركات لإعادة تسعير الدواء ليتماشي مع تكلفة التصنيع وحسب اخر أرقام قفزت مبيعات مصر من الأدوية خلال شهري يناير وفبراير من 2025 بنسبة 55% مقارنة بنفس الفترة من العام الماضي ودا اللي قاله رئيس هيئة الدواء المصرية علي الغمراوي وقال إن دا بسبب افتتاح خطوط إنتاج جديدة، وزيادة عدد المستحضرات المسجلة.
الارقام بتقول إن ارتفاع حجم مبيعات الدواء خلال أول شهرين من 2025 وصل إلى 62 مليار جنيه، مقارنة ب 40 مليار خلال نفس الفترة العام الماضي نتيجة زيادة الإنتاج من عبوات الأدوية من 570 مليون عبوة إلى 600 مليون عبوة.
وارتفعت مبيعات سوق الدواء المصري خلال 2024 إلى 307 مليار جنيه بحجم تداول وصل 3.5 مليار عبوة مقابل مبيعات بـ216 مليار جنيه، وتداول 3.7 مليار عبوة في 2023...
صادرات مصر من الأدوية والمستحضرات الطبية ارتفعت خلال أول شهرين من العام الجاري بنسبة 28% وسجلت 135 مليون دولار، مقابل 105 ملايين دولار في نفس الفترة من 2024...
الدكتور مصطفى مدبولي رئيس الحكومة سبق وأكد أن الدولة عندها طموح لمضاعفة قيمة صادرات المستحضرات الطبية والأدوية إلى 3 مليار دولار بحلول 2030، مقابل مليار دولار سجلتها في 2024.. وتصريحات مدبولي بتاخدنا لسكة توسيع الإنتاج والسيطرة على سوق الأدوية في افريقيا ودا سوق بينمو بسرعة كبيرة جدا مع تحسن الأوضاع الاقتصادية لدول كتير في القارة السمراء.
كل المؤشرات بتقول إن مصر قدامها فرصة من دهب عشان تسيطر مبكرا على السوق الافريقي في صناعة حيوية جدا ودا بسبب الإمكانيات الكبيرة في مصر سواء من خبرة في صناعة الأدوية أو في البنية الأساسية الحديثة أو جذب الاستثمارات للقطاع دا وفي نفس الوقت مصر اقرب الدول للأسواق الأفريقية بحجم التاريخ والجغرافيا ودا غير أن الدواء المصري ليه سمعة دولية جيدة ومصر بتصدر لاكتر من 147 دولة حول العالم.
طيب المواطن هيستفيد ايه من انتعاش صناعة الادوية؟
طبعا فيه استفادة مهمة ومباشرة في اكتر من شكل أولها توافر الأدوية في السوق لأن النقص بيسبب ارتفاع جنوني في الأسعار وفي نفس الوقت خطر على صحة المواطنين وتأتي حاجة زيادة الإنتاج بيسبب زيادة في المنافسة بين الشركات وبالتالي تخفيض اسعار الأدوية مع زيادة المعروض وكمان زيادة التصدير معناه موارد دولارية جديدة هتساعد في السيطرة على أسعار الصرف واسعار السلع المستوردة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
){kind=link}