هو ايه اللي بيحصل بالظبط في سوق الديون المصرية؟ وليه تكلفة التأمين على الديون السيادية ارتفعت لأعلى مستوى ليها من سبتمبر اللى فات .. وهل ده معناه إن الاستثمارات الأجنبية في أدوات الدين الحكومية هتخاف وتهرب؟ .. ولا الموضوع ده مجرد موجة وهتروح زي ما جت؟
في الفترة الأخيرة لاحظنا إن تكلفة التأمين على الديون السيادية لمصر قفزت قفزة كبيرة .. وصلت لأعلى مستوى من سبتمبر 2024 .. يعني تخيل إن العقود اللي بتأمن على ديون مصر لمدة 5 سنين بقت بـ 6.95% في تداولات يوم الجمعة اللي فاتت .. ودي زيادة كبيرة قوي عن الأسبوع اللي قبله لما كانت 5.5% بس.
حد ممكن يسال ويقول هي ايه أصلا تكلفة التأمين دي؟
ببساطة هي زي التأمين اللي بتعمله على عربيتك أو بيتك .. لكن هنا بتأمن على فلوسك لو حصل حاجة وحشة للدولة وماقدرتش تدفع ديونها .. يعني كل ما التكلفة دي بتعلى .. كل ما الناس بتبقى شايفة إن المخاطر على مصر بتزيد .. وده بيخلي الأسواق تضيف علاوة مخاطر أكبر على السندات المصرية.. يعني سعر السندات بينزل.. والعائد بيطلع.
وعشان نفهم الموضوع بصورة أوضح خلينا نقول لحضراتكم ان بيانات بورصة لندن بتقول إن عوائد السندات المصرية الدولية زادت بشكل ملحوظ .. مثلاً السندات اللي طرحتها مصر في فبراير 2033 وصل عائدها يوم الجمعة اللي فات لأكتر من 11% .. ودي قفزة كبيرة قوي قدام 10 % في الأسبوع اللي قبله .. وأصلاً لما اتطرحت كان عائدها 9.45% بس .. وكمان السندات اللي مستحقة في فبراير 2030 وصلت لـ 10.54% قدام 9.4% الأسبوع اللي قبله .. وفائدة الطرح كانت 8.625% .. يعني في كل الحالات العائد بيطلع .. وده معناه إن المستثمرين بقوا طالبين فلوس أكتر عشان يشتروا ديون مصر.
ايه اللي بيحصل لما تكلفة التأمين والعائد بيطلعوا كده؟
الموضوع بيبقى زي السلاح ذو الحدين .. من ناحية .. الطروحات الجديدة اللي مصر هتعملها في المستقبل هتبقى أغلى .. يعني لو عايزة تقترض من الأسواق الدولية هتدفع فوايد أعلى .. لكن من ناحية تانية .. السندات اللي مصر أصدرتها فعلاً قبل كده مش هتتأثر .. لأن فوايدها ثابتة ومحددة من زمان.
طب المشكلة فين؟
المشكلة إن الزيادة دي بتقلل من قدرة مصر على الاقتراض الجديد .. خصوصاً إن مصر كانت ناوية تطلع بإصدارات ديون صغيرة ومتنوعة بآجال طويلة .. وده جزء من خطتها إنها تخفض الدين الحكومي الخارجي بنحو مليار لمليارين دولار كل سنة .. لكن لما تكلفة التأمين والعائد بيطلعوا كده .. المستثمرين الأجانب بيبقوا حذرين أكتر .. وبيفكروا مليون مرة قبل ما يحطوا فلوسهم في أدوات الدين المصرية.
بعني باختصار .. الاستثمارات الأجنبية في السندات والأوراق المالية الحكومية ممكن تتأثر جدًا .. المستثمر اللي بيشوف تكلفة التأمين بتزيد كده بيحس إن المخاطر بتكبر .. وبيبقى عايز عائد أعلى عشان يعوض المخاطر دي .. وده بيخلي مصر في موقف صعب .. لأنها محتاجة الاستثمارات دي عشان تدعم الاقتصاد وتوفر الدولارات اللي بتحتاجها في الفترة الجاية.
طيب والحل ايه؟
مفيش حل سحري .. لكن مصر لو قدرت تثبت إنها ماشية صح في خططها الاقتصادية .. وإنها هتقدر تسدد ديونها في المواعيد .. ممكن ترجع الثقة للمستثمرين تاني .. وده محتاج إصلاحات اقتصادية قوية وشفافية في الأرقام .. عشان المستثمر الأجنبي لما يحس بالأمان هيرجع يشتري سندات مصر حتى لو العائد مش عالي قوي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
