أثارت الاعلامية ياسمين عز كعادتها حالة من الجدل الشديد وذلك بتوجيه بعض الحديث للفتيات في بداية حلقتها الجديدة من برنامج كلام الناس المذاع اليوم على شاشة قنوات mbc مصر، وتحدثت أيضا عن مفهوم العلاقة الصحية والغير صحية من وجهة نظرها.
ياسمين عز: ليه أول ما تتخطبي موبايلك بيبوظ
وقالت ياسمين عز في تصريحات رصدها موقع تحيا مصر : ليه أول ما تتخطبي موبايلك بيبوظ وتدلعي وتعملي فيها زعلانة ولو قالك تعالي اجبلك موبايل حنين بتقلبي وشك وتقولي مش بمسك الا موبايل أبو تفاحة تلاتة شعلة.. الله يرحم موبايلك النوكيا أبو كشاف اللي قعد معاكي سنين لحد ما خطيبك جالك، بتطلبي من خطيبك موبايلك بتفاحة وانتي اخر مرة شوفتي فيها تفاحة كان اخوكي مخبيها منك في كيس في التلاجة.
كما تطرقت ياسمين عز بحديثها عن العلاقة الصحية والغير صحية، قائلة: عايزة تعرفي أنتي في علاقة صحية ولا لأ بصي على جهازك العصبي مش الهضمي، لو لقيتي نفسك بتتحركي بسرعة ومش مرتاحة ومتنرفزة ومش عارفة تنامي من كتر التفكير وبتطشي البطاطس بعصبية اعرفي إن جهازك العصبي فيه مشكلة، بتاكل بنهم وبتاكلي أخواتك الصغيرين في البيت جهازك العصبي غلط، من غير ما تروحي للدكتور أنا طبيبتك هنا، وفري الفلوس وروحي جيبي له هدية، والعكس صحيح لو لقيتي نفسك هادية أنتي في علاقة صحية، من غير دكاترة.
ياسمين عز: الدهب بقى بأكتر من 5 آلاف جنيه ومحدش لاقي يتجوز
واختتمت ياسمين عز حديثها: لو سألتيني أنتي في علاقة صحية يا ياسمين؟، هقولك مالكيش دعوة أنتي مش صاحبتي متدخليش في خصوصيتي، علاقة صحية إيه اللي بتسألوني عليها.. الذهب بقى بـ أكتر من 5000 جنيه، العلاقة صحية أو مش صحية محدش لاقي يتجوز.
يذكر، أنه تراجعت ياسمين عز عن تصريح قالته في احدى حلقات البرنامج وهي أن المرأة المطلقة لابد أن تأخذ نصف ثروة الرجل بعد الطلاق.
ياسمين عز تتراجع عن هذا التصريح
وقالت ياسمين عز: لما قولت أن الست تاخد نص ثروة الراجل لما تتطلق حسيت بالذنب ومعرفتش انام، لأن زي ما فيه رجالة وحشة فيه رجالة كتير حلوة وفيه ستات كتير وحشة مش كله زي بعضه لو الراجل كويس وعمل نفسه وبنى بيته معاكي بأي حق تاخدي نص ثروته الموضوع ده لغوه من زمان برة وده لان فيه ستات كانت بتروح تتجوز الرجالة الغنية عشان تاخد فلوسهم.. لكن الفرعون الكبير الصغير الطيب الجميل ده ده بعد ما تعب وشقي تاخدي كل حاجة على الجاهز.. اي ماسكة عليه ذلة! ممضياه على شيك على بياض، واخدة عليه وصولات أمانة، لا معكيش اي مستندات يبقى بأي حق تاخدي نص ثروته اللي تعب وشقي فيها!.
