ليه قطر والكويت بيضخوا استثمارات بمليارات الدولارات في مصر دلوقتي؟ وإزاي الفلوس دي ممكن تقلب موازين الاقتصاد المصري؟ وهل ده معناه إن أزمة الدولار قربت تتحل؟ كل دي أسئلة مهمة.
الرئيس عبد الفتاح السيسي خلّص جولة خليجية مكثفة في قطر والكويت وخلّيني أقولك إن الجولة دي كانت زي الزلزال الاقتصادي ليه؟ لأنها جابت حزمة استثمارات بـ14 مليار دولار.. آه والله.. 14 مليار دولار.
في قطر.. تم الاتفاق على استثمارات بـ7.5 مليار دولار.. منهم 2 مليار هيتضخوا في 2025.. والباقي هييجي بين 2026 ومنتصف 2027.. وفي الكويت.. مصر بتستهدف استثمارات بـ6.5 مليار دولار لحد نهاية 2026.. منهم 4 مليار هيدخلوا خلال السنة دي
طب إيه القطاعات اللي هتستفيد؟
في قطر.. الاستثمارات هتركز على التطوير العقاري.. السياحة.. الصناعة.. الموانئ.. المناطق اللوجستية.. الخدمات المالية.. والأمن الغذائي.. وفي الكويت.. الاستثمارات هتغطي 8 قطاعات زي الطاقة.. الزراعة.. تكنولوجيا المعلومات.. العقارات.. البنوك.. والصناعات الدوائية.. يعني كلام كبير ومشاريع هتغيّر الواقع.
طب ليه الاستثمارات دي مهمة؟ وإيه اللي يخلي 14 مليار دولار يفرقوا مع مصر؟
الإجابة ببساطة إن الاستثمارات دي زي الأوكسجين للاقتصاد المصري.. مصر بتعاني من أزمة شح في العملة الأجنبية.. يعني الدولار بقى عملة صعبة المنال.. وده بيأثر على كل حاجة: استيراد البضايع.. أسعار المنتجات.. وحتى تكلفة المعيشة.
ولما بتدخل استثمارات زي دي.. بيحصل حاجتين:
أولاً.. الدولارات دي بتدخل البنك المركزي المصري.. وده بيزود احتياطي النقد الأجنبي.. يعني مصر هتقدر تستورد أكتر.. وتلبي احتياجات السوق من غير ما الأسعار تتجنن.
ثانياً.. المشاريع دي بتخلّق آلاف فرص العمل.. تخيّل مشاريع في السياحة زي فنادق جديدة أو منتجعات.. أو مصانع في الصناعة.. أو حتى موانئ متطورة.. كل ده معناه شغل للشباب.. ودخل أحسن للأسر المصرية.. يعني الـ14 مليار دولار مش بس فلوس.. ده استثمار في استقرار الاقتصاد.. وفي مستقبل أجيال جاية.
وايه تأثير الاستثمارات على أزمة الدولار؟
أول حاجة.. الـ14 مليار دولار هتدخل السوق على مراحل.. يعني مش كلها مرة واحدة.. وده بيضمن استدامة التأثير.. الـ2 مليار من قطر والـ4 مليار من الكويت في 2025 هيدو البنك المركزي دفعة قوية.. وهيخلّوه يقدر يتحكم في سعر الصرف أحسن.
ثانياً.. الاستثمارات دي بتقلل الضغط على الدولار.. لأن المشاريع اللي هتتعمل هتقلل حاجتنا للاستيراد.. زي مثلاً مشاريع الأمن الغذائي.. لو بنزرع أكتر وبننتج أكتر.. هنحتاج نستورد أقل.. وده بيوفر دولارات.
كمان.. المشاريع دي بتجذب مستثمرين تانيين.. لما قطر والكويت يحطوا فلوسهم في مصر.. ده بيدي إشارة للعالم إن مصر سوق آمن ومربح.. وده بيجيب استثمارات أكتر.. وبالتالي دولارات أكتر..
يعني باختصار.. الاستثمارات دي زي العلاج السريع لأزمة الدولار.. وبنفس الوقت استثمار طويل الأجل عشان نعتمد على نفسنا أكتر.
طب مصر هتستفيد إزاي على المدى الطويل؟
لو بصينا للصورة الكبيرة.. الاستثمارات دي هتغيّر شكل الاقتصاد المصري.. إزاي؟.. هقولك .. أولاً.. هتزود الصادرات.. مصر عايزة توصل صادراتها لـ145 مليار دولار بحلول 2030.. ومشاريع زي تطوير الموانئ والمناطق اللوجستية هتسهل تصدير البضايع.. وده بيجيب دولارات كتير.
ثانياً.. هتقوّي البنية التحتية.. مصر خلال الـ10 سنين اللي فاتوا استثمرت 550 مليار دولار في طرق وموانئ ومدن جديدة.. والاستثمارات الجديدة هتكمّل المشوار ده.. يعني بنية تحتية أقوى.. وجاذبية أكبر للمستثمرين..
ثالثاً.. هتدعم القطاع الخاص.. الحكومة عايزة القطاع الخاص يمسك 70% من الاقتصاد.. والمشاريع دي هتفتح الباب لشركات مصرية وأجنبية تشتغل مع بعض.
وأخيراً.. الاستثمارات دي هتدي دفعة للثقة في الاقتصاد المصري.. لما المستثمرين يشوفوا إن قطر والكويت بيراهنوا على مصر.. هيبقوا عايزين يدخلوا هما كمان.. وده بيخلّي السوق أقوى وأكثر استقرار.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
