ناس كتير بسال هل ممكن أسعار الذهب تنخفض في مصر خصوصا أن أسعار الدولار في النازل وسعر صرف الجنية المصري كل يوم بيتحسن عن اليوم اللي قبله.. وهل ممكن الاسعار تنزل ل 4000 جنية من تاني.
أسعار الذهب واحدة من الحاجات اللي بتشغل بال ناس كتير جدا في الشارع المصري خصوصا أن الذهب بيعد من أهم الأوعية الادخارية في الوقت الحالي ومن بداية 2025 وهو محقق مكاسب كبيرة جدا للمستثمرين وكل اللي استثمر فلوسه في الذهب حقق مكاسب كبيرة جدا الفترة اللي فاتت.
بعد المكاسب الكبيرة اللي حققها الذهب في الفترة اللي فاتت والتراجع اللي رجع تاني في الأسعار الناس كلها بتسأل اية اللي بيحصل في سوق الذهب وليه الأسعار يومين في الطالع وزيهم في النازل، واية اللي بيتحكم في أسعار الذهب عندنا في مصر وآية اللي بيخلي الأسعار ترتفع وترجع تنخفض تاني خصوصا أن مصر من فترات طويلة فيها استقرار نسبي لأسعار صرف العملات الأجنبية في البنوك ده غير أن سعر صرف الجنية المصري في الفترات الأخيرة محقق مكاسب كبيرة جدا .
طيب اية اللي هيا الحاجات اللي بتأثر في أسعار الذهب في مصر ؟.
في البداية لازم نكون عارفين ان أسعار الذهب في مصر بتتأثر بالسعر العالمي بمعني أن السعر العالمي لو رفع الأسعار عندنا في مصر هترتفع لو انخفضت برضوا الأسعار عندنا في مصر هتنخفض، وفي الفترة الأخيرة السعر العالمي للذهب في تذبذب كبير جدا بسبب التطورات والاحداث الجيوسياسية والاقتصادية واللي بتحصل في العالم كله واللي كلها للاسف اثرت وخلت أسعار الذهب ترتفع لارقام كبيرة خصوصا أن أغلب البنوك المركزية حوالين العالم اتجهت لتحويل جزء كبير جدا من احتياطياتها النقدية الي سبائك ذهبية وده بسبب التقلبات الموجودة في أسعار العملات واللي بقت يوم في الطالع ويوم في النازل .
لازم نعرف كمان أن الزيادات والانخفاض اللي حصل في مصر اسعار الذهب كان السبب فيه هو الأحداث اللي حصلت في أسعار المعدن الأصفر علي مستوي العالم، خصوصا أن من بداية توالي الرئيس الأمريكي دونالد ترامب حكم البيت الأبيض وهو عامل حالة من القلق العالمي في الاقتصاد بسبب القرارات اللي أخذتها الإدارة الأمريكية بفرض رسوم جمركية علي البضائع والواردات للسوق الأمريكي وتهديده بإقالة رئيس البنك الفيدرالي الأمريكي.
طيب هل استقرار أسعار الصرف في مصر ممكن تخلي أسعار الذهب في مصر تنزل ل 4000 جنية ؟
زي ما قولت لحضراتكم أن أسعار الذهب في مصر مرتبطة بالسعر العالمي أكثر منها ارتباطا بسعر الصرف في مصر وده اللي خلي أسعار الذهب في الفترة الأخيرة ترتفع لارقام قياسية، ولكن استقرار سعر الصرف في مصر بيخلي الأسعار مستقرة ومفيش فيها أي تذبذب داخلي ولكن صعب جدا الأسعار تنخفض وجرام الذهب عيار 21 واللي هو الأكثر مبيعا وانتشارا في مصر خصوصا في القري والمحافظات تنزل ل 4000 جنية خصوصا في ظل إستمرار التحديات والتوترات الجيوسياسية والاقتصادية العالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
