يا ترى إيه قصة ال 49 مليار دولار اللي دخلوا الاقتصاد المصري قريب، وإزاي قدر يستوعب الرقم ده وايه مصدره؟
فاكرين من كام سنة كنا بنسمع عن انخفاض الاحتياطي النقدي، والمخاوف من نقص الدولار، بس انهارده الوضع اتقلب 180 درجة والاقتصاد المصري سجل رقم تاريخي جديد، و الاحتياطي النقدي وصل لأكتر من 49 مليار دولار لأول مرة من سنين طويلة.
طب ازاي ده حصل، وإيه معنى الرقم ده؟
في الأيام الأخيرة، البنك المركزي أعلن إن احتياطي النقد الأجنبي لمصر وصل في نهاية يوليو ل 49.036 مليار دولار، يعني زاد بحوالى 336 مليون دولار عن شهر يونيو.
والمفاجأة، ان دي المرة ال35 على التوالي اللى ببيزيد فيها الاحتياطى، يعني فيه صعود مستمر ومستقر ودي علامة قوية إن الاقتصاد ماشي على الطريق الصح.
طب الرقم ده معناه إيه؟
ببساطة، كل ما الاحتياطي يزيد فالجنيه المصري يبقى أقوى والسوق يبقى أهدى والمستثمرين يطمنوا والدولة تقدر تواجه الأزمات بكل ثقة، وده بيأكد إن الإصلاحات اللي حصلت في السياسة النقدية بدأت تدي نتيجة.
طب نقدر نقول إن مصر بقت آمنة اقتصاديا؟
فعلا، الاحتياطي اللي عندنا دلوقتي يقدر يغطي واردات مصر لأكتر من 8 شهور ونص، والطبيعي عالميا هو 3 شهور بس، يعني إحنا داخلين على منطقة الأمان بجدارة، وفي ظل التوترات اللي بتحصل في العالم، من حروب وأسعار طاقة مضروبة ده بيخلينا في مكان قوي ومستقر.
كمان، ده بيعتبر درع حماية لان الاحتياطي ده بيحمينا من خروج مفاجئ لرؤوس الأموال او الأموال الساخنة، وكمان تقلبات في سعر الفايدة عالميا والتضخم اللي ممكن ييجي من الاستيراد.
طيب الفلوس دي جت منين؟
بص يا سيدي، ةلموضوع مش ضربة حظ ولا مساعدات بس، دع في 5 حاجات أساسية ورا الزيادة دي، وهي عودة قوية للسياحة وتحويلات المصريين من الخارج في أعلى مستوياتها، وكمان استثمارات أجنبية في أدوات الدين و تمويلات ميسّرة من مؤسسات دولية، وده بجانب ترشيد فاتورة الاستيراد، وده قلل الضغط على الدولار.
واللي أهم من كده هي الثقة، اللي بتتبني يوم بعد يوم من المؤسسات الدولية ومن المستثمرين وحتى من الناس اللي بقت شايفة تحسن في السياسات، والرسالة واضحة وهي ان مصر ماشية على طريق إصلاحي حقيقي وبقوة.
والخلاصة، هي ان الاحتياطي النقدي مش بس رقم بيتقال في نشرات الأخبار لا ده مؤشر بيقولك إن في إدارة محترفة للموارد وإن البلد بتقدر تفي بالتزاماتها وتخطط للاستثمار وتواجه الأزمات من غير ما تنهار، واللي جاي ممكن يكون أقوى لاننا لسه في بداية الطريق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
