السياسة النقدية مش بس رفع وخفض فايدة .. ولا هي سعر صرف وتضخم .. فيه خطط أكبر .. وأبعد .. خطط بتبني مستقبل جيل كامل .. وبتجاوب على اسئلة مهمة زي مين اللي هيدير البنوك المصرية في المستقبل؟ ومين اللي هيكون على رأس أكبر المؤسسات المالية في مصر؟ إزاي هنضمن إن عندنا كوادر قادرة على مواجهة التحديات العالمية؟
إجابة كل الأسئلة دي عند حسن عبدالله .. محافظ البنك المركزي .. الراجل اللي مش بيبص تحت رجليه .. ده بيبني جيل مصرفي جديد .. جيل قادر على المنافسة وقادر على القيادة.
القصة مش مجرد قرار عادي .. دي رؤية استراتيجية .. بدأت بمبادرة قوية ومهمة .. إطلاق برنامج بكالوريوس العلوم المصرفية بالتعاون مع الجامعات المصرية المرموقة .. ده مش مجرد دبلومة أو كورس تدريبي .. ده برنامج أكاديمي متكامل .. بيجمع بين النظرية والتطبيق.. بين العلم والخبرة.
تخيل كده .. طالب بيدرس في الجامعة .. بيدرس المناهج اللي بيحطها أكبر خبراء القطاع المصرفي .. بيدرس إيه اللي بيحصل في السوق دلوقتي .. بيدرس أحدث التكنولوجيات المالية .. بيتعلم إزاي يدير المخاطر .. وإزاي يقود فرق العمل .. مش بس كده .. ده كمان بيتدرب عملي في أكبر البنوك المصرية .. بيتعلم من أهل الخبرة .. بيتعايش مع بيئة الشغل الحقيقية.
المبادرة دي ليها أهداف أكبر من مجرد تخريج دفعة جديدة من الموظفين .. الهدف هو خلق مصرفي من الطراز الرفيع .. مصرفي فاهم .. واعي .. عنده مهارات تحليلية قوية .. عنده رؤية للمستقبل .. قادر على اتخاذ قرارات صعبة في أوقات الأزمات .. قادر على قيادة المؤسسة اللي شغال فيها للنجاح..
ده غير كمان إن المبادرة دي بتخدم أهداف تانية مهمة جداً .. زي سد الفجوة بين التعليم الأكاديمي واحتياجات سوق العمل .. شركات كتير بتشتكي من إن الخريجين محتاجين تدريب طويل عشان يتأهلوا لسوق العمل .. لكن مع البرنامج ده .. الخريج هيكون جاهز من أول يوم..
حسن عبدالله مش بيخطط بس للبنوك .. ده بيبني رأس مال بشري .. ده بيستثمر في العنصر الأهم في أي مؤسسة .. العنصر البشري .. المبادرة دي هي حجر الأساس لمستقبل القطاع المصرفي في مصر .. هي الخطوة الأولى في طريق طويل من التطور والازدهار ..
الأكيد إن البنك المركزي المصري بقيادة حسن عبدالله بيثبت إن دوره مش بس رقابي وتنظيمي .. دوره أكبر من كده بكتير .. دوره قيادي .. دور بيبني مستقبل أجيال .. بيجهز شباب مصر عشان يكونوا قادة المستقبل في أهم قطاع اقتصادي في البلد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
