الحكومة عازمة علي خفض أسعار السيارات في مصر وهتكون عندنا هتكون ارخص من كل اسواق العالم .. ياتري دي هيتحقق ازاي.. وآية خطة الدولة لزيادة الإيرادات من صناعة وبيع وتصدير السيارات.
الدولة المصرية في الألفية الحالية عندها تحدي من نوع خاصة وهو توطين صناعة السيارات بمختلف أنواعها في مصر سواء كانت السيارات العادية اللي مطلوبة في السوق المحلي أو السيارات الكهربائية واللي هيا التوجه العالمي كله رايح لها في المستقبل خصوصا انها بتراعي الجوانب البيئية وجاية ضمن خطة الدولة للحفاظ علي المناخ.
وعلشان مصر توصل لخطتها وتحول مصر لمركز إقليمي لصناعة السيارات، فالدولة قدمت تسهيلات كبيرة جدا لكبري شركات صناعة السيارات حوالين العالم لدخول السوق المصري، وده بهدف توطين الصناعات والطرازات المختلفة من السيارات المطلوبة في السوق المحلي، وفعلا في السنين اللي فاتت اغلب الماركات العالمية دخلت السوق المصري وبنت مصانع لها في مناطق مختلفة من محافظات الجمهورية وكمان بدأنا نصنع وننتج الكميات المطلوبة لتغطية النقص المحلي.
في الوقت الحالي الحكومة عندها خطة لسد النقص المحلي من استهلاك واستيراد السيارات من الخارج خصوصا أن فاتورة مصر الاستيرادية من السيارات كانت عالية جدا وكانت بتستنزف جزء كبير جدا من احتياطات النقد الأجنبي في مصر، وده كان بيمثل عبئ كبير علي الموازنة العامة للدولة واللي كانت مطالبة بتوفير الموارد الدولارية المطلوبة لعمليات الاستيراد وتغطية النقص اللي موجود في السوق المحلي.
طيب اية مستهدفات الحكومة من توطين صناعة السيارات في مصر ؟
خلال الوقت اللي فات، مصر نجحت في استقطاب 7 توكيلات كبرى أهمهم جى بى أوتو وكيل هيونداي وشيري وهافال والمنصور للسيارات وكيل إم جي الصينية، ونيسان إيجيبت وكيل نيسان والشركة المصرية التجارية وأوتوموتيف وكيل سيارات فولكسفاجن، وأغلبهم بدأ بالفعل في ضخ انتاج في السوق المصري وده زود المعروض بالأسواق، وده خلي اغلب توكيلات السيارات في مصر تعلن عن تخفيضات كبيرة في الاسعار بهدف زيادة البيع والتخفيضات حاليا بتترواح من 25 و200 ألف جنيه علي حسب نوع وسعر كل سيارة.
شعبة السيارات في مصر أعلنت أن أسعار السيارات الجديدة من الفئات الاقتصادية تراجعت بنسبة 25% منذ بداية العام الحالي، وتوقعت ان التخفيضات توصل لـ 30% بنهاية العام للسيارات الجديدة و25% للسيارات المستعملة، خصوصا أن التصنيع المحلي سهل فرصة طرح فئات متنوعة من السيارات وبخيارات عديدة قدام المواطنين، وده دفع الشركات ووكلاء السيارات المستوردة لخفض اسعارهم للحفاظ على حصتها من المبيعات، خصوصا في ظل استقرار أسعار الصرف في مصر.
شعبة السيارات توقعت كمان انفخاض الأسعار في مصر خلال الوقت اللي جاي مع بدأت الإنتاج الفعلي لشركة النصر للسيارات المصرية لإنتاج أكثر من 7 طرازات سيارات بأسعار تنافسية الأسبوع اللي فات وده هيعمل رواج اكبر في سوق السيارات في مصر .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
