رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، اتفاقية مهمة للبترول، والدهب يعاود الصعود من جديد، وطفرة كبيرة فى صادرات الملابس.
نبدأ جولتنا من وزارة البترول..
المهندس كريم بدوي، وزير البترول والثروة المعدنية، حضر النهارده توقيع اتفاقية جديدة مع "مارتينا أوبيتسي" رئيسة منطقة شمال أفريقيا والمشرق العربي في شركة إيني الإيطالية، وده حصل في مقر الوزارة في مدينة العلمين الجديدة.
الاتفاقية دي بين الهيئة العامة للبترول، وشركة إيجاس، وشركتي إيني (أيوك) وبي بي، وبتشمل شروط تحفيزية عشان يبدأوا شغل استكشاف جديد للغاز الطبيعي في البحر المتوسط.
الاتفاق بيشمل حفر بئر استكشافي في منطقة "تمساح" خلال الفترة الجاية، وده ضمن خطة الوزارة لتكثيف البحث عن الغاز الطبيعي وزيادة فرص الاكتشافات الجديدة.
وبعد التوقيع، الوزير كريم بدوي قال إن الاتفاق ده بييجي ضمن أول محور في استراتيجية الوزارة، واللي هدفه زيادة الإنتاج المحلي من الغاز والبترول، وكمان تلبية احتياجات السوق المحلي من خلال تكثيف أنشطة البحث في المناطق البحرية اللي فيها فرص واعدة.
وأشار كمان إن منطقة "تمساح" دي نتيجة تعاون طويل المدى بين هيئة البترول وإيجاس والشركاء، وده غير الشغل الفني الكبير والخبرات اللي اتجمعت على مدار السنين.. وأكد على أهمية الاستفادة من التكنولوجيا الحديثة اللي بتقدمها شركات زي إيني وبي بي عشان نقدر نطلع موارد جديدة تفيد الدولة وكل الأطراف.
ونروح بقى لسوق الذهب..
أسعار الذهب النهارده ارتفعت في السوق المحلية..
وسجل سعر جرام الذهب عيار 21 - واللي هو أكتر عيار بيتباع في السوق - حوالي 4600 جنيه.
وسجل عيار 24 - الأغلى في مصر - حوالي 5257.25 جنيه للجرام.
أما عيار 18 فسجل حوالي 3942.75 جنيه للجرام، وعيار 14 وصل لـ 3066.75 جنيه.
أما الجنيه الذهب، فبلغ سعره حوالي 36800 جنيه، وده لأن وزنه 8 جرام من عيار 21.
وطبعًا الأسعار دي بتختلف من محل للتاني حسب المصنعية، واللي بتتراوح بين 150 لـ400 جنيه حسب نوع العيار والمكان والمحافظة.
ونروح لقطاع الملابس الجاهزة..
المجلس التصديري أعلن عن طفرة كبيرة في صادرات الملابس خلال أول 6 شهور من 2025، اللي وصلت لـ 1.608 مليار دولار، مقارنة بـ 1.283 مليار في نفس الفترة السنة اللي فاتت.. يعني نسبة نمو وصلت لـ 25%.
وأوضح المجلس إن الأداء ده بيكمل النمو الإيجابي اللي حققه القطاع الفترة اللي فاتت، خصوصًا في شهر يونيو اللي فات.. اللي سجل صادرات بـ 285 مليون دولار، مقارنة بـ 199 مليون دولار في يونيو 2024.. يعني زيادة بنسبة 30%، وقربنا كمان من أعلى معدل شهري اتسجل السنة دي في فبراير بنسبة نمو 33%.
كمان صادرات القطاع لأمريكا - واللي هي أكبر سوق لينا - زادت بنسبة 16%، ووصلت لـ 622 مليون دولار في النصف الأول من 2025، بدل 536 مليون السنة اللي فاتت.
المهندس فاضل مرزوق، رئيس المجلس التصديري، قال إن الصادرات ماشية في اتجاه قوي جدًا، وممكن نوصل لأول مرة في التاريخ لـ 3.7 مليار دولار صادرات نهاية السنة، متوقعًا استمرار النمو بنسبة ما بين 25 لـ30% سنويًا.
وآخر خبر معانا من البنوك والمبادرة العقارية..
فيه 10 بنوك فقط هما اللي ضخوا تمويلات لمتوسطي الدخل ضمن مبادرة التمويل العقاري، وده بقيمة 2.921 مليار جنيه لعدد 8515 عميل لحد آخر يونيو 2025.
بنك القاهرة كان في المركز الأول، وضخ حوالي 851.6 مليون جنيه، يليه البنك الأهلي اللي ضخ 629 مليون جنيه لـ2112 عميل، وبنك مصر ضخ 572.5 مليون جنيه.
بنك التعمير والإسكان ضخ 250.8 مليون جنيه، والبنك التجاري الدولي CIB ضخ 208.3 مليون، وQNB ضخ 164 مليون، والعربي الأفريقي الدولي ضخ 147.5 مليون.
أما بنك نكست ضخ 42.8 مليون جنيه، والتنمية الصناعية ضخ 27.5 مليون، والمصرف المتحد ضخ 26.7 مليون.
أما على مستوى كل البنوك والشركات اللي شاركت في المبادرة، فتم ضخ تمويلات بحوالي 88.3 مليار جنيه لأكتر من 642.3 ألف عميل لحد آخر يونيو.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
