هي ايه قصة الاستثمارات اللي جاية من الهند لمصر، هل هتكون استثمارات تقيلة وفي مجالات حيوية، ولا لسه بداية جديدة للشركات الهندية في مصر؟
في الحقيقة، في استثمارات جاية من الهند لمصر في الطريق، والاستثمارات دي تقيلة، يعني من الآخر العلاقات بين مصر والهند مش مجرد كلام دبلوماسي، لأ دي داخلة على شراكة اقتصادية جديدة ممكن تفتح أبواب كبيرة للنمو وفرص شغل حقيقية.
ومن هنا، محمد شيمي، وزير قطاع الأعمال العام، قابل السفير الهندي "سوريش ريدي"، واتكلموا في تفاصيل التعاون، مش بس مجاملات، لأ ده لقاء موسع اتناقش في فرص استثمارية في شركات ومصانع تابعة للوزارة.
والوزير بنفسه رحب بالمستثمرين الهنود وقالهم تعالوا شوفوا المصانع بنفسكم، عندنا فرص جاهزة في أكتر من مجال، والدولة مجهزة حوافز وتيسيرات مفيش زيها، طب إيه المجالات اللي مطروحة؟
طبعا، صناعة الأدوية خاصة المواد الخام اللي بتدخل في علاج الأمراض المزمنة والمستعصية، وكمان الغزل والنسيج والملابس الجاهزة، ودي صناعة مصر بتشتغل على تطويرها بقوة، ده غير الأسمدة والصناعات الكيماوية، وتصنيع الألومنيوم والمركبات وحتي قطاع التعدين والفنادق يعني شغل على كل المستويات، وكل دي مجالات محتاجة ضخ استثمارات وخبرة وده اللي الجانب الهندي ممكن يقدمه.
أما السفير الهندي، فقال إن بلده شايفة في مصر فرصة كبيرة، خصوصًا بفضل الموقع الجغرافي المميز، والبنية التحتية اللي اتحدثت فعلا، من طرق لموانئ لمناطق صناعية متكاملة، وده اللي بيخلي مصر مش بس سوق واعد، لكن كمان بوابة لدخول أفريقيا وأوروبا.
واللي بيأكد على كده، إن وزارة قطاع الأعمال بتركز على إنها تفتح باب التعاون العالمي، مش بس على الورق لأ على الأرض، وده جزء من خطة أكبر لجذب استثمارات أجنبية مباشرة وتطوير شركات القطاع العام وتحقيق تنمية اقتصادية مستدامة.
يعني من الآخر، الحكومة بتشتغل على إنها تخلق فرص شراكة حقيقية مع دول زي الهند، بهدف تعظيم القيمة المضافة في الصناعات الوطنية، وده معناه فرص عمل أكتر، إنتاج أعلى، وتصدير أكتر، وكل ده بيفيد الاقتصاد المصري.
والسؤال اللي بيطرح نفسه.. هل التعاون ده ممكن يتحول لمشروعات فعلية، وهل فعلاً هنشوف مصانع جديدة وشراكات حقيقية؟
الإجابة في الشهور الجاي، بس الأكيد إن البداية واعدة والمناخ الاستثماري في مصر بيجذب الأنظار من الشرق للغرب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
