يا ترى إزاي الاقتصاد المصري قدر يحقق أعلى معدل نمو ربع سنوي من 3 سنين، ايه هي الأسباب ورا القفزة دي وهل ده تحسن حقيقي في المسار الاقتصادي ولا مجرد أرقام على ورق؟
في خبر يمكن ناس كتير ماخدتش بالها منه، بس مهم جدا، وهو ان معدل نمو الناتج المحلي الإجمالي في مصر وصل ل 4.77% في الربع التالت من السنة المالية 2024/2025، وده أعلى رقم نحققه في أي ربع خلال آخر 3 سنين.
طب إزاي وصلنا للرقم ده؟
أولًا بسبب الاستثمار الخاص، وده لان الاستثمار الخاص استحوذ على حوالي 62.8% من إجمالي الاستثمارات المنفذة، بنسبة نمو سنوية 24.2%.
كمان، الدولة بتكمل في الإصلاحات الهيكلية يعني مش بس بنظبط أرقام، لأ دع احنا بنعيد ترتيب البيت من جوه، فالحكومة مركزة على تمكين القطاع الخاص وتحسين الحوكمة وتسهيل الإجراءات بشكل حقيقي.
تالت حاجة هي ان الطاقة الجديدة والمتجددة بقت لاعب أساسي، ومن هنا ناقشت الوزيرة رانيا المشاط مع شركة "ميريديام" مشروع ضخم لطاقة الرياح في خليج السويس بقدرة 1.1 جيجا وات بتكلفة أكتر من مليار دولار، وبتمويل مشترك من مؤسسات دولية زي البنك الأوروبي، والبنك الإفريقي وغيرهم، يعني مش بس استثمارات داخلية لأ كمان ثقة عالمية في الاقتصاد المصري.
رابع حاجة معانا، هي ان الحكومة شغالة على جذب الاستثمار بجد، ورئيس الوزرا الدكتور مدبولي قال انهم حريصين على تهيئة بيئة جاذبة للاستثمارات، وده دليل على إن الحكومة ماشية بخطى ثابتة في ملف الاستثمار، وبتدي حوافز حقيقية للمستثمرين.
خامس سبب هو فتح أسواق واتفاقيات دولية، ووزير الاستثمار كان في اليابان عشان يناقش زيادة التبادل التجاري والاستثمارات المشتركة، يعني فتح علاقات جديدة ومصادر تمويل متنوعة، وده عنصر مهم لأي اقتصاد نامي.
والسؤال بقى، هل النمو ده هيفضل مستمر ولا دي فقاعة وهتنفجر؟
بص يا سيدي، لو بصينا على اتجاه الدولة، هنلاقي إنها بتشتغل على كذا محور في نفس الوقت زي جذب استثمار وتشغيل وتصدير وكمان إصلاحات داخلية ده غير توطين للصناعة والتكنولوجيا، وده معناه إننا قدام بداية مرحلة جديدة ممكن فعلاً تغير شكل الاقتصاد بس بشرط وهو الاستمرار والمراقبة والشفافية.
يعني من الآخر، الاقتصاد المصري دلوقتي مش بس بيجري، ده بيجري ومعاه خطة، ولكن هل الخطة دي هتكمل وهل فعلاً هنشوف التغيير ينعكس على حياة الناس، ولا هنفضل نقول أرقام حلوة من غير ما نحس بيها في الشارع؟. الإجابة مش بعيدة، والأيام الجاية هتقول.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
