هو ليه الدولار رجع يعلى تاني بعد ما نزل، هل ده معناه ان الجنيه هيعرف يرجع لمكانته، طب ايه سر الارتفاع وتوقعات مستقبل العملة الأمريكية في الفترة الجاية؟
في البداية، لازم نعرف إن الدولار مش بيعلى في مصر بس، لأ دي حركة عالمية متأثرة بكذا عامل، أولهم الرسوم الجمركية الجديدة اللي فرضتها أمريكا، واللي سببت تذبذب في سوق الصرف الأمريكي نفسه.
يعني الدولار عالميا نزل شوية لكن فضل محافظ على مكاسب أسبوعية، وده عشان بيانات اقتصادية خرجت من أمريكا وقالت إن التضخم هناك مش بالسوء اللي الناس كانت متوقعاه وده خفف المخاوف، بس في نفس الوقت في إشارات إن التضخم ممكن يرجع يعلى في الصيف، حسب كلام رئيس الفيدرالي الأمريكي "چيروم باول"، والسبب هو السياسات التجارية والجمركية الجديدة اللي أمريكا شغالة بيها.
نرجع لمصر بقى، وسعر الدولار انهارده فضل شبه ثابت عند نفس مستويات آخر هبوط، يعني مثلا في االبنك المركزي الدولار سجل 49.36 للشراء و49.49 للبيع، وفي البنك الأهلي وبنك مصر وبنك الإسكندرية وCIB وبنك أبو ظبي الإسلامي الأسعار متقاربة حوالين 49.37 للشراء و49.47 للبيع، يعني السوق المصري واقف شوية على استقرار مؤقت.
لكن السؤال الأهم، هل الجنيه ممكن يرجع يقوى تاني؟
الإجابة مش مستحيل بس محتاج 3 حاجات تحصل، اولها ضخ استثمارات أجنبية قوية تدخل السوق، وتاني حاجة هي تحسن كبير في إيرادات الدولار من السياحة والتصدير وتحويلات المصريين، وأخيرا استقرار اقتصادي وسياسي أكبر عشان يخلي المستثمرين عندهم ثقة في السوق.
غير كده، هنفضل في نفس الدوامة اللي بنشوفها ما بين تذبذب ارتفاعات بسيطة واستقرار مؤقت، خاصة وان السوق دايما بيراقب اللي بيحصل في أمريكا لأن اللي هناك بيأثر علينا هنا.
في نقطة مهمة لازم نفهمها وهي دور صندوق النقد الدولي والاتفاقات الدولية، خاصة وان الفترة اللي فاتت مصر بدأت تحصل على دفعات من التمويلات والاتفاقات زي صفقة “رأس الحكمة” وغيرها، وده ساعد على تهدئة السوق لفترة، لكن لسه الطريق طويل لأن المستثمر الأجنبي عايز يشوف إصلاحات على الأرض مش بس وعود، وعايز يشوف مرونة أكتر في السياسة النقدية وسهولة في تحويل الأرباح بالدولار.
طيب نعمل إيه كأفراد.. نحوش بالدولار ولا نشتري دهب؟
حاول تعتمد على وضعك الشخصي، لكن كمبدأ عام لازم الناس تكون حريصة في القرارات المالية اليومين دول، يعني اللي بيشتري دولار أو دهب لازم يكون فاهم إن دي أدوات تحوط مش وسيلة للربح السريع، ومهم إننا نتابع التغيرات الاقتصادية ونفكر على المدى الطويل، لأن السوق دايما بيتغير، واللي بيكسب هو اللي بيقرأ اللى جاي صح.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
