ناس كتيرة بتكون متخوفة من أنها تحط فلوسها في البنوك، وعندهم هوس أن الفلوس ممكن تروح أو تتسرق.. ياتري ازاي عملاء البنوك يقدروا يأمونوا حساباتهم في البنوك.. وهل ممكن حسابات العملاء في البنوك يحصل عليها هكر وتروح.
في الفترات الأخيرة البنوك حدثت كل الخدمات الرقمية اللي بتقدمها للعملاء، وبالتحديثات دي خلت تعامل العملاء علي حساباتهم بقي اسهل بكتير وممكن العميل يعمل كل شغله ويحول ويستقبل فلوس من تليفونه المحمول وبتكه زرار واحدة وبدون مشاوير وطوابير علشان يخلص مصلحة في البنك.
الخدمات الرقمية الكتيرة اللي البنوك قدمتها للعملاء خلت بعض الناس تسأل ازاي البنوك دي بتأمن حسابات الناس، وهل ممكن الفلوس اللي موجودة في الحسابات يحصل عليها هكر أو حد يستولي عليها لمجرد أن عميل أخطا، واية هيا اهم وسائل الأمان اللي لازم كل عميل يعملها علشان يأمن حساباته في البنوك.
الأسئلة دي كلها جاوبت عليها اغلب البنوك الموجودة في مصر واللي علي طول بتوجه نصائح للمواطنين عن خطوات تأمين الحسابات البنكية وخطوات التعامل الأمن عليها، وده من خلال خطوات سهلة وبسيطة أولها، إنشاء كلمات مرور معقدة ومش مباشرة لكل التطبيقات الخاصة بالحسابات البنكية وتطبيقات الدفع الإلكتروني الموجود على الموبايل، وكمان عدم استخدام نفس كلمة المرور لأكثر من تطبيق، وتفعيل المصادقة الثنائية، وده بيقدم حماية إضافية من خلال اشتراط إرسال كود خاص بتنفيذ أي عملية على أي تطبيق، ويكون استلامه من خلال البريد الإلكتروني أو من خلال الموبايل.
النصائح اللي وجهتها البنوك للعملاء للحفاظ علي حساباتهم بالبنوك تضمنت كمان، تحديث الموبايل باستمرار خصوصا أن التحديثات بتشمل معالجة للثغرات اللي ممكن أي شخص ينوي اختراق البيانات اللجوء ليها، وتجنب استخدام شبكات الواي فاي المفتوحة في أماكن عامة زي الكافيهات خصوصا أنها بتسهل عمليات اختراق البيانات، ومتابعة الحسابات البنكية باستمرار للتأكد من عدم إجراء أي عملية سحب غير معلومة.
في نصيحة مهمة البنوك علي طول بتأكد عليها علي العملاء وهيا عدم حفظ كلمات المرور على الموبايل، وفي حالة سرقة الموابايل، لازم العميل يبلغ الشرطة علي طول، ويوقف التعامل علي البطاقات الائتمانية ويغير كلمات المرور الخاصة بيه في كل التطبيقات والحاسبات البنكية وحسابات السوشيال.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
