ليه مصر عملت مشروع محطة الضبعة النووية؟.. هل فعلا المحطة دي هتحل أزمة الكهرباء؟.. وهل هتوفر لنا كهرباء بشكل مستمر؟
محطة الضبعة النووية ده مشروع بيعتبر من أكبر وأهم المشاريع في تاريخ مصر الحديث، واللي هيوفر لمصر كهربا بشكل ضخم جدًا، وكمان نظيفة وآمنة، يعني مش بس بننتج طاقة، لأ، دي كمان طاقة نووية صديقة للبيئة، ما بتطلعش انبعاثات بتلوث الجو.
المحطة مش بس هتدخل كهربا، دي هتشغل آلاف المهندسين والفنيين، وده معناه فرص شغل كتير قوي للمصريين، مش بس وقت البناء، لكن كمان في التشغيل والصيانة لسنين طويلة قدام.
المحطة دي كمان هتنقل مصر لمصاف الدول اللي عندها تقنية نووية متقدمة، وده بيرفع مكانتنا عالميًا، وبيفتح لنا أبواب تعاون وتكنولوجيا وفرص استثمار ضخمة، غير كده، أن المحطة دي معمولة بأعلى معايير الأمان العالمي، وبمساعدة من روسيا، يعني الخبرة والتكنولوجيا موجودة، والرقابة كمان موجودة.. مش بس وكده.. دي المحكمة دي هتساعد مصر تقلل من استهلاك الغاز الطبيعي في إنتاج الكهرباء، وده معناه إن الغاز ممكن نصدره، وندخل عملة صعبة للبلد.
وزير الكهربا، قال إن محطة الضبعة مش مجرد مباني أو إنشاءات، دي حجر أساس في خطة مصر إنها تأمن مصدر طاقة نظيف، موثوق، ومستدام، وقال كمان إن المشروع ده مش بس بيولّد كهربا، لكن كمان هدفه يبني قاعدة تكنولوجية محترمة في مصر، وينقل خبرات العالم للناس بتوعنا هنا.
وده جه خلال افتتاح مجمع تدريب وإنتاج جديد بيتخصص في مراقبة الجودة وتقييم الكفاءة وتدريب الناس اللي هيشتغلوا على المشروع، الوزير كان معاه مدير شركة روساتوم الروسية، اللي هي الشركة اللي بتنفذ المحطة، وده بيأكد قد إيه الشراكة بين مصر وروسيا قوية جدًا في المشروع ده.
المجمع التدريبي ده مساحته أكتر من 5000 متر، ومجهز بأحدث المعدات، وفيه ورش، ومحاكيات بالحجم الطبيعي، وكمان أجهزة حقيقية بيستخدموها فعليًا في المحطات النووية، وكلها جاية من كبرى الشركات الروسية.
يعني ببساطة، الناس اللي هتشتغل في الضبعة هتتدرب على أعلى مستوى، وكأنهم في روسيا نفسها.
وخلال الزيارة، الوفد شاف الموقع نفسه، وشافوا إزاي الشغل ماشي بسرعة في كل وحدة من وحدات الطاقة الأربعة، سواء في إنشاء "الجزيرة النووية"، أو مبنى التوربينات، أو صب الأساسات.
المخطط إن أول مفاعل هيتم تركيب وعاءه النووي قبل نهاية سنة 2025، والتلات وحدات التانيين شغالين فيهم على قدم وساق.
يعني الخلاصة.. أن محطة الضبعة النووية مش بس محطة كهربا، دي مدينة كاملة بتتبني ونقلة نوعية كبيرة في مستقبل مصر الاقتصادي والعلمي والصناعي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
