"بيسرقوا البنات فى زحمة الطرق"..
تداول رواد مواقع التواصل الاجتماعي شهادة فتاة روت تفاصيل واقعة سرقة تعرضت لها هي وبنت خالتها يوم الجمعة الماضي، في تمام الساعة 12 منتصف الليل، أعلى كوبري العروبة بطريق صلاح سالم، حيث قام مجهولون بخطف هاتف محمول من داخل السيارة ولاذوا بالفرار.
وقالت الفتاة في منشورها:
"يوم الجمعة اللي فاتت، تحديدًا الساعة 12 بالليل، في شارع صلاح سالم كوبري العروبة، كنت سايقة عربيتي وجنبي بنت خالتي، والكوبري حرفيًا واقف من كتر الزحمة، مفيش مكان لعربية تتحرك. جم البلطجية دول شدوا تليفون بنت خالتي من الشباك وجريوا، ومحدش قدر حتى يتحرك خطوة عشان شايفين إننا بنتين، وعشان الطريق واقف، طاروا بالمكنة."
منشور وصورة المتهمين
وأضافت:
"أول ما الطريق فتح، جريت بالعربية، بس كان عدى تقريبًا 10 أو 12 دقيقة. كنت ماشية وحاسة إني هقابلهم تاني، مشيت بالراحة، مَجريتش بالعربية، وببص على شمالي لقيتهم ماشيين بالراحة جدًا. سألت بنت خالتي لأنها هي اللي شافت وشهم، قالتلي: هم دول".
وتابعت:
"جريت عليهم ومسكت تليفوني، وقلت لهم: يا حرامية يا ولاد الـ...، أول ما بصّوا، صورتهم، وطاروا بالمكنة. جريت وراهم، فضلت أجري لحد ما دخلوا شارع ضلمة، فضلت أجري وأزعق وأقول: حرامي!، الشارع كان ضلمة جدًا، ودخلوا حتة عكس مقدرتش أدخل فيها بالعربية".
واختتمت شهادتها قائلة:
"عملت محضر، لكن مفيش جديد، ياريت شير، عشان أنا من وقتها مستنية يتمسكوا كفاية الرعب اللي شوفناه".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
