هو ايه بالظبط اللي بيحصل في البنك المركزي ؟ وهل احنا فعلا في طريقنا للتخلص من سيطرة الدولار؟ وممكن نشوف الجنيه المصري بيتبادل مع عملات تانية زي اليوان الصيني من غير ما نحتاج للدولار وسيط؟
في خطوة مهمة جدًا .. استقبل حسن عبد الله محافظ البنك المركزي المصري .. نظيره محافظ البنك المركزي الصيني والوفد المرافق ليه.. الزيارة دي مش مجرد بروتوكول عادي .. دي بتفتح أبواب تعاون جديدة ومهمة بين أكبر دولتين في الشرق الأوسط وآسيا.
اللقاء ده كان فرصة عشان الجانبين يناقشوا سبل تعزيز التعاون بين البنكين المركزيين .. وتطوير آليات تبادل الخبرات الفنية في كل اختصاصات البنوك. وده غير دعم العلاقات الاقتصادية اللي بتخدم المصالح المشتركة للبلدين.
أهم نقطة تم مناقشتها في اللقاء ده كانت اتفاقية مبادلة العملات .. الاتفاقية دي هي المستقبل ومعناها إن مصر والصين يقدروا يتعاملوا تجاريًا واستثماريًا مع بعض بالعملة المحلية لكل بلد .. يعني الجنيه المصري واليوان الصيني.
تخيلوا معايا .. بدل ما مصر تدفع بالدولار للصين عشان تستورد بضاعة .. أو الصين تدفع بالدولار لمصر عشان تستورد منتجاتنا .. الاتنين هيدفعوا بالعملة المحلية بتاعتهم. ده هيقلل الاعتماد على الدولار بشكل كبير .. وهيخفف الضغط على العملة الخضرا في السوق المصري.
والسؤال اللي بيطرح نفسه هنا .. ليه مصر مهتمة بتوقيع اتفاقيات تبادل عملات محلية مع دول تانية؟
الإجابة بسيطة وواضحة.. ده بيقلل الطلب على الدولار في السوق المصري .. وبالتالي ممكن يساعد في استقرار سعر الصنيه..و بدل ما بندفع دولارات في وارداتنا من الصين .. هندفع بالجنيه المصري .. وده هيحافظ على احتياطي النقد الأجنبي.
كمان لما تكون التعاملات بالعملة المحلية .. ده بيسهل حركة التجارة بين البلدين وبيقلل التكاليف..و مصر كده مش هتكون معتمدة على الدولار بس .. هيكون عندها سلة عملات متنوعة تقدر تتعامل بيها.
الاتفاقيات دي بتقوي العلاقات الاقتصادية والسياسية مع الدول اللي بنعمل معاها اتفاقيات زي كده
اللقاء ده ما وقفش عند مبادلة العملات بس .. ده كان فيه نقط تانية مهمة جدًا. المحافظين ناقشوا إصدار مصر لسندات "الباندا" في سوق المال الصيني. سندات الباندا دي هي سندات بتصدرها جهات أجنبية في الصين باليوان الصيني. ده بيفتح لمصر باب جديد لتمويل مشروعاتها .. ويجيب استثمارات مباشرة باليوان.
كمان ناقشوا سبل الربط بين أنظمة المدفوعات في كلا البلدين. ده معناه إن التعاملات المالية هتكون أسهل وأسرع وأكثر كفاءة بين مصر والصين. وده هيشجع الاستثمار المتبادل.
وتم التأكيد على أهمية تعزيز تواجد البنوك الصينية في مصر والبنوك المصرية في الصين. ده هيدفع ويشجع الاستثمارات المشتركة بين البلدين بشكل كبير.
بعد اللقاء .. تم توقيع 3 مذكرات تفاهم مهمة جدًا.. مذكرة تفاهم بين بنك قناة السويس .. وشركة "تيدا" الصينية-الإفريقية للاستثمارات .. وشركة CIPS المحدودة (المشغلة لنظام المدفوعات بين البنوك عبر الحدود في الصين) .. الهدف منها تعزيز وتشجيع استخدام اليوان الصيني بين الأطراف المعنية في منطقة التعاون الاقتصادي والتجاري بين مصر والصين. يعني هتشجع الشركات المصرية والصينية إنها تتعامل باليوان مباشرة.
بروتوكول تعاون بين شركة UnionPay الصينية وشركة "بنوك مصر للتقدم التكنولوجي" .. وده عشان يحسنوا البنية التحتية للدفع الإلكتروني في مصر .. ويوسعوا نطاق قبول بطاقات UnionPay. يعني أي حد معاه بطاقة UnionPay .. هيقدر يستخدمها في أي نقطة بيع إلكترونية أو على الإنترنت في مصر. ده هيسهل كتير على السياح والمستثمرين الصينيين.
بروتوكول تعاون تاني بين UnionPay وشركة باي موب .. ده للتعاون في تسويق ونشر خدمات القبول الإلكتروني للشركات والمواقع الإلكترونية المتعاقدة مع باي موب .. عشان حاملي بطاقات UnionPay.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
