يا ترى ليه سعر الدهب بقى متذبذب اليومين دول، يوم يطلع ويوم ينزل، ودلوقتي هل الناس تشتري ولا تستنى شوية، وإيه توقعات الأسعار الفترة الجاية؟
في الساعات الأخيرة، أسعار الدهب شهدت موجة تذبذب كبيرة، وسجل عيار 21 سعر حوالي 4620جنيه، بس المفاجأة إن السعر ده طالع محليا في نفس الوقت اللي الدهب عالميا بيهبط!
يعني ببساطة، في 3 عوامل بيأثروا على أسعار الدهب، أولها الوضع العالمي، خاصة وإن الدهب بره بيتراجع شوية، وسعر الأونصة وصل ل3324 دولار بعد ما كان 3340 دولار.
" title="تقلبات في أسعار الدهب شوف السبب وتوقعات عيار 21" frameborder="0">
ورغم إن في توتر سياسي عالمي، خاصة بعد قرارات "ترامب" بفرض رسوم على واردات من اليابان وكوريا، إلا إن عائد السندات الأمريكية بيزيد، وده بيخلي المستثمرين يبعدوا شوية عن الدهب.
عندك كمان، الوضع المحلي عندنا في مصر، فسعر الدهب طالع شوية بسبب استقرار الدولار مقابل الجنيه، وده بيخلي أي تغيير في الأسعار العالمية ميبقاش له تأثير كبير علينا.
كمان، الطلب المحلي ضعيف، فالناس حاليا مش بتشتري دهب بكميات كبيرة، سواء للزينة أو للاستثمار، بسبب الظروف الاقتصادية والالتزامات في موسم الصيف.
طيب هل ده معناه نشتري ولا نستنى؟
بص يا سيدي، الخبراء شايفين إن السوق المصري بيمر بفترة توازن مؤقت، يعني الأسعار مش هتطلع قوي ولا هتنزل جامد، وممكن نفضل في نفس النطاق خلال الأيام الجاية.
لكن خد بالك، اي تغير في سعر الدولار أو في التوترات العالمية ممكن يقلب الطاولة، خاصة لو التضخم في أمريكا زاد، والفيدرالي الأمريكي رفع الفايدة، أو حصلت أزمة سياسية مفاجئة.
طب ايه التوقعات لعيار 21؟
لو الوضع فضل ثابت، فممكن السعر يفضل حوالين 4600 او 4700 جنيه، اما لو حصلت مفاجآت عالمية أو ارتفع الدولار محليا فممكن نشوف قفزات تاني، كمان لو الطلب المحلي رجع يزيد زي موسم المناسبات والجوازات، فالأسعار هتتحرك لفوق أسرع.
والخلاصة، هي إن الدهب دلوقتي في مرحلة ترقب، واللي عايز يشتري يتابع السوق يوم بيوم، فمفيش قرار موحد للكل، انت اللي تحدد حسب احتياجك وميزانيتك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
