خلي بالك وأنت بتشتري دهب، ودي النصيحة اللي أي حد هيقولهالك وأنت نازل تستثمر فلوسك، بس إزاي تشتري من غير ما حد يغشك؟.. وإزاي تبعد عن الدهب المغشوش؟ وهل الشرا عن طريق الإنترنت مضمون ولا نصب؟
الناس بقى عندها اقتناع تام أن الاستثمار في الدهب هو الملاذ الآمن اللي محدش يختلف عليه، وده بعد ما أسعاره بقت بتجري وتطلع بسرعة الصاروخ، وخاصة بعد التوترات الجيوسياسية وحرب إيران وإسرائيل الأخيرة.
بس إزاي تشتري دهب مضمون؟
كل خبرا الدهب نصحوا أن مينفعش تجري على أي حاجة صفرا أو بتلمع وتفتكرها دهب وتحط فيها كل فلوسك، ولازم تتأكد كويس جدا أن الدهب لازم تشتريه من أماكن موثوق فيها، وتبع تماما عن الشرا عن طريق الإنترنت، حتى لو كانت بفاتورة، وعشان تكون مطمن، تروح تشتري من الشركة المصنعة، ودي أفضل طريقة عشان تحافظ على فلوسك.
طيب تحط فلوسك سبايك ولا جنيهات دهب؟
الخبراء قالوا أن مفيش فرق بين شراء السبايك والجنيهات الدهب، بس الأهم من كل ده أنك تتأكد أن السبيكة أو الجنيه، مدموغة من الدمغة المصرية، ولازم كمان تكون من شركة كبيرة ومشهورة، كمان نصحوا نصيحة مهمة جدا، وهي أنك عشان تضمن تشتري دهب سواء سبيكة أو جنيه، لازم تكون مغلفة ومش مفتوحة ومن إنتاج شركة كبيرة في مصر، والتأكد من السريال نمبر المتطابق مع الشركة المصنعة، عشان تضمن أن فلوسك في أمان.
مش بس وكده، عشان تشتري دهب مضمون، لازم تبعد عن شرا الدهب المنفصل عن بعضه بوزن كبير، زي الغوايش مثلا، وكمان تبعد عن أطقم الدهب اللي بتعمل أوزان عالية لأنها بترفع التكلفة.
الخلاصة.. لازم تشتري الدهب من أماكن معتمدة وكمان تاخد فواتير رسمية بكل جرام بتشتريه، واللي بيكون فيها كل التفاصيل عشان تضمن الجودة والمصدر، لأن برغم ارتفاع سعره وتكلفته، هيفضل الدهب هو الاستثمار الآمن على المدى القصير، وكويس جدا على المدى الطويل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
