ليه مصر فجأة بدأت تسند مناطق بترول وغاز لشركات عالمية؟ وايه علاقة ده بالكهربا اللي بتقطع.. والدولار اللي بنجري وراه؟ يعني ببساطة.. ازاي شوية أبار غاز ممكن يقلبوا الموازين كلها؟
بص يا سيدي.. اللي حصل مؤخرا إن شركة إيجاس.. ودي الشركة القابضة للغازات الطبيعية في مصر.. أعلنت إنها أسندت 6 مناطق امتياز جديدة لشركات بترول وغاز عالمية.. يعني بالعربي كده.. مصر قالت للشركات دي: تعالى اشتغل.. وادفع فلوس.. ولو لقيت غاز ولا بترول.. يبقى نكمل ونقسم الأرباح.
طب المناطق دي فين؟
4 منهم في البحر المتوسط.. و2 على الأرض في دلتا النيل وشمال سيناء.
وخد بالك .. الشركات اللي دخلت الساحة تقيلة جدا.. زي شيفرون.. شل.. إيني الإيطالية.. وكايرون.. وكل شركة مخططة تحفر من بئرين لتلاتة في كل منطقة.. يعني بنتكلم في 13 بئر استكشافية هيتحفروا في الفترة الجاية.. باستثمارات متوقعة توصل لـ 245 مليون دولار مبدئيا.
طب ده معناه ايه بقى؟
معناه إن مصر بتوسع رقعة البحث عن الغاز والبترول.. وده بيزود فرص إنها تلاقي اكتشافات جديدة زي اللي حصل في حقل ظهر زمان.. وكل ما نلاقي غاز أكتر.. كل ما ننتج أكتر.. وكل ما ننتج أكتر.. نقلل الاستيراد.. ونوفر عملة صعبة.
وعلى فكرة.. الغاز مش بس مهم للتصدير وكسب دولارات.. ده كمان أساسي عشان نحل أزمة تخفيف الأحمال اللي كلنا حاسين بيها.. لإن محطات الكهرباء في مصر بتشتغل أغلبها بالغاز الطبيعي.. وكل ما ننتج أكتر.. نوفر أكتر.. والمحطات تشتغل بكفاءة.. والكهربا تقطع أقل.. يعني اللي بيحصل دلوقتي مش مجرد حفريات وشغل شركات.. ده شغل استراتيجي ممكن يشيل عن كاهل البلد ضغط كبير جدا.
كمان في نقطة مهمة.. بوابة مصر للاستكشاف والإنتاج لسه عارضة فرص تانية للاستثمار في البحر المتوسط.. وهيتم غلق باب التقديم في 2 يوليو 2025.. وده معناه ان فيه شركات تانية هتيجي.. واستثمارات جديدة هتدخل.. وده معناه دولارات أكتر داخل البلد.
وبالتالي.. ممكن نقول إن الحكومة بتحاول تضرب 3 عصافير بحجر واحد: رقم واحد تزود إنتاج الغاز وتصدر.. ورقم اتنين.. تحل أزمة الكهرباء جزئيا.. ورقم تلاتة.. تقلل العجز في العملة الأجنبية.
السؤال المهم هل فعلا الغاز ممكن يكون طوق النجاة لمصر من أزمة الكهرباء والدولار؟ وهل ده بداية لمرحلة جديدة من الاكتشافات زي حقل ظهر؟.. الأيام الجاية هتجاوب على كل الأسئلة دي وهتكشف مستقبل الاستثمار في مجال الغاز.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
