"مسامحة من قلبي".. أسما شريف منير توجه رسالة لمنتقديها بسبب زواجها

تعرضت الفنانة والإعلامية أسما شريف منير للعديد من الإنتقادات خلال الأيام القليلة الماضية، وذلك بعد الإعلان عن زواجها للمرة الثالثة من أحمد شامل عزمي.

أسما شريف منير توجه رسالة لمنتقديها بسبب زواجها

وردت أسما شريف منير على هذه الإنتقادات خاصة بعد تعرضها للتنمر، وكتبت أسما من خلال حسابها الرسمي عبر موقع تبادل الصور والفيديوهات القصيرة "إنستجرام":" لكل شخص شتمني، تنمّر عليّا، أو أساء الظن بيّا، أنا مش بزعل، ومش باخدها على قلبي… مش لأني ما بحسّش، لكن لأني تعلّمت إن القلوب اللي فيها نور، بتعفو، وبتعدي.. لأن ربنا قال:"والكاظمين الغيظ والعافين عن الناس والله يحب المحسنين."

وأضافت: "أنا اخترت أبقى من الناس اللي ربنا يحبها، مش هرد إساءة بإساءة، ولا كلمة بكلمة.. ربنا أمرنا نكون أرقى، حتى قدام الظلم:
“ولا تستوي الحسنة ولا السيئة، ادفع بالتي هي أحسن.”".

وتابعت: "اللي بيني وبين ربنا عمره ما كان محتاج شهادة من بشر، واللي بيظن السوء، ربنا قال عنه: “يا أيها الذين آمنوا اجتنبوا كثيرًا من الظن، إن بعض الظن إثم.".

وأوضحت: “أنا مسامحة من قلبي، مش ضعف.. لكن قوة إني ما أخليش الحقد و الزعل يسكن في صدري، وسايبة كل حاجة لربنا.. لأنه قال: “فمن عفا وأصلح فأجره على الله."

واستكملت: "أنا عندي رسالة أمل، وبدعي من قلبي إن ربنا يكرم كل ست، ويشجعها تتجوز وتبدأ من جديد من غير ما تخاف من المجتمع، ولا من نظرات الناس اللي كده كده الناس بتصطاد الأخطاء، ربنا يعفينا منهم، ولا من الكلام اللي بيقول: “مريضة”، “مستفزة”، “بجحة”، وكلام كتير مالوش لازمة، كله اتبدل بحسنات".

وأختتمت: "ربنا هو اللي بيختار ويعوض.. مش الناس".