يا ترى إيه هي مهمة وأهداف صندوق مصر السيادي، وليه الحكومة عملت الصندوق ده في الفترة الأخيرة، هل عشان تزود الاستثمارات اللي داخلة البلد ولا عشان تعمل قبلة حياة للاقتصاد؟..
في الأيام الأخيرة، حصل اجتماع مهم بين الرئيس عبد الفتاح السيسي وقيادات الحكومة، واتكلموا فيه عن أهمية تحسين مناخ الاستثمار، وإن مصر لازم تكون مركز إقليمي لجذب الاستثمارات الأجنبية المباشرة.
والاجتماع ده ركز على صندوق مصر السيادي للاستثمار والتنمية، واللي بيعتبر نهج أو أسلوب استثماري استثنائي في الفترة دي، لأنه بيشتغل على أكتر من مهمة.
يعني ببساطة، الصندوق ده بيعتبر وسيلة جديدة بتنفذها الدولة عشان تطور أصولها وتستثمرها بشكل صحيح، وفي نفس الوقت هاتجيب دخل ثابت للدولة وتقدر تفتح باب لمشاركة القطاع الخاص.
ونقدر نقول إن الصندوق ده بيتبع سياسة "الاستثمار متعدد القطاعات"، وبيتحرك من خلال صناديق فرعية وشركات تابعة، يعني كل صندوق فرعي بيشتغل على قطاع معين زي الصناعة أو الطاقة أو اابترول مثلا، وبيتم إدارته من خلال خبرات وكوادر متخصصة.
أما أهداف الصندوق او مهماته، فهي كتير ومهمة جدا، واللي أولها هو تحقيق عائد مالي مستدام على المدى الطويل، من خلال استثمارات متوازنة ما بين المخاطرة والعائد، وكمان جذب الاستثمارات الأجنبية والمحلية للقطاعات اللي فيها فرص واعدة.
ومش بس كده، لأ ده كمان بيستهدف الشراكة مع القطاع الخاص في مشروعات جديدة أو تطوير مشروعات موجودة دلوقتي بالفعل، وكمان الصندوق ده هيحفز الاقتصاد، وده هيكون من خلال تطوير الكيانات القومية ودفعها للتوسع سواء إقليميا أو دوليا.
والأهم من كل كده، هو إن الصندوق بيخطط إنه يستثمر خارج مصر، وكمان بيقدر بيطبق معايير البيئة والحوكمة المجتمعية واللي هي (ESG)، وده معناه إنه أي مشروع بيتم الاستثمار فيه لازم يكون ملتزم بالمعايير البيئية وحقوق العاملين والشفافية، وكل ده، بيخليه متوافق مع توجهات مؤسسات دولية زي مؤسسة التمويل الدولية IFC والبنك الأوروبي لإعادة الإعمار والتنمية EBRD.
وعشان كده، الصندوق دلزقتي بيشتغل بما يتماشى مع رؤية مصر 2030 وأهداف التنمية المستدامة، وكمان بيركز على قطاعات بتمثل أكتر من 60٪ من الناتج المحلي الإجمالي لمصر، وده معناه إن هيكون في تحرك إيجابي على الاقتصاد بشكل مباشر وسريع.
والخلاصة هي، إن الصندوق السيادي ده مش بس فكرة اقتصادي، ده رؤية طويلة المدى لإدارة أصول الدولة وتحقيق أكبر استفادة منها، ومش بس كده ده كمان هيقدر يجذب استثمارات جديدة، وهيفتح مجالات شراكة بطريقة تضمن لمصر الاستدامة والشفافية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
