هو نوع نصب منتشر اسمه "احتيال اليانصيب"، وناس كتير للأسف بتقع فيه واللي بيحصل باختصار إن جهة بتتصل بيك.. بتقولك إنك كسبت جايزة مالية كبيرة، وبيطلبوا منك شوية بيانات عشان تبقى مؤهل تستلم الفلوس.
طبعا الكلام بيبقى شكله رسمي جدا، والناس بتصدق.
المحتالين دول شغالين بطريقة منظمة.
ممكن يكلموك على الموبايل أو يبعتوا رسالة واتساب أو إيميل ويقولوا إنك فزت بجايزة، ويطلبوا منك تدخل على رابط أو تكلم رقم معين، وبعدها يطلبوا منك بياناتك الشخصية أو البنكية، بحجة تحويل الجايزة. ساعات كمان يطلبوا منك تدفع رسوم بسيطة عشان "إجراءات التحويل"، ولما توافق وتبعت البيانات أو تدفع، تكتشف إنهم كانوا بيلعبوا بيك.
الخطر في الحكاية دي إنهم ممكن يظهروا بشكل مقنع جدا، يتكلموا لغات، ويبقوا حافظين سكريبتات شبه الرسمية، ويتقمصوا شخصيات زي محامين أو موظفين في بنوك أو حتى جهات حكومية.
المهم تعرف إن مفيش حاجة اسمها تفوز بجايزة وانت أصلا ما دخلتش يانصيب ولا مسابقة. ودايما خليك واعي إن أي جهة تطلب منك بياناتك البنكية أو الرقم السري أو كود لمرة واحدة على الواتساب أو بالتليفون، فهي جهة مش موثوقة، وغالبا هدفها النصب عليك.
لو حسيت إن في حاجة مش مريحة أو مش منطقية، كلم البنك بتاعك على رقمه الرسمي واستفسر، أو تجاهل الرسالة من البداية. ومهما كانت الإغراءات، متشاركش بياناتك مع حد.
وعشان تبقى عارف إن الموضوع حقيقي وخطير، في راجل إسباني كان عايش في دالاس في أمريكا، جاله تليفون وقالوله إنه كسب 12.5 مليون دولار.
فرح جدا واداهم رقم الضمان الاجتماعي وكل بياناته البنكية عشان يحولوله الفلوس. بعدها اكتشف إنهم سحبوا كل اللي في حسابه، وكمان خلوه مديون للبنك بـ20 ألف دولار. هو ما كانش واخد باله غير لما البنك كلمه وقاله إن رصيده بالسالب. كل ده لأنه صدق مكالمة شكلها رسمي ومقنعة.
الحكاية مش هزار، وناس بتخسر فلوسها ومستقبلها بسبب شوية معلومات شاركوها مع ناس غلط. خد بالك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
