هي ايه حكاية جسر موسي اللي قالبة الدنيا في مصر.. وازاي هيكون فيه جسر يربط البحر الأحمر أوله في مصر وآخره في دولة تانية..وايه أهمية المشروع دي وازاي هيغير خريطة الاقتصاد والتجارة في المنطقة.
الساعات اللي فاتت مواقع التواصل الاجتماعي كانت مقلوبة ودا بعد خروج تصريحات ومعلومات أكيدة عن بدء التحضير لمشروع قومي استراتيجي في المنطقة بين مصر والسعودية.. هيكون عبارة عن جسر أو محور مروري يربط بين البلدين عبر البحر الأحمر..
طيب ماهو فكرة المشروع مش قديمة.. ايه الجديد ؟.
فعلا المشروع فكرة قديمة بين البلدين لكن تنفيذه اتأخر كتير لأسباب مختلفة لكن المرة دي الحكاية بجد ودخلت في خطوات التنفيذ ودا اللي أكد عليه الطرفين..
وبخصوص تفاصيل الجسر واللي هيطلق عليه اسم حصر موسي نسبة للنبي موسي عليه السلام اللي شق البحر الأحمر.. فهو هيتمد من مدينة شرم الشيخ في جنوب سيناء المصرية لمنطقة رأس حميد في تبوك شمال غرب السعودية وهيبلغ طوله ما بين 7 إلى 10 كيلومترات، وهيضم ممرات للسيارات، وخطوط سكك حديدية، ومسارات للمشاة، ومرافق خدمية متكاملة... وتختيار المنطقة دي عشان الجسر يمر فيها مكانش صدفة .. بالعكس دي جت بعد دراسة وافية ولأسباب كتير منها إن المناطق دي هتتحول لعاصمة للسياحة في المنطقة ولأنها كمان بتعتبر تقاطع التجارة ومراكز حركة البضائع وأسباب تانية كتير..
طيب ايه أهمية المشروع دا ؟
شوف ياسيدي المشروع مش بس جسر، ده محور لوجستي جديد هيقلل زمن الشحن والتكاليف بين آسيا وأفريقيا، وهيعزز حركة التجارة اللي بتتخطى 10 مليار دولار سنوياً بين البلدين... وسياحيا "جسر موسى" هيكون شريان جديد للحج والعمرة، وهيسهل انتقال مئات الآلاف من المصريين للأراضي المقدسة براً، بسرعة وأمان.. كمان المشروع هيخدم مشاريع عملاقة زي "نيوم" و"ذا لاين"، وهيكون نقطة جذب استثماري للقطاع السياحي في البحر الأحمر.
حسب التصريحات تكلفة الجسر هتوصل لاكتر من 5 مليار دولار وهيوفر آلاف فرص العمل المباشرة وغير المباشرة، وهيعزز البنية التحتية على الجانبين... وناس شايفة إنجسر موسى هيكون رمز لشراكة استراتيجية متجددة بين القاهرة والرياض في إطار رؤية السعودية 2030 ومبادرات التنمية المصرية، لطريق مشترك و مستقبل اقتصادي متكامل.. وكمان هيكون نقطة تحول اقتصادي وتجاري في المنطقة وسياحي وتوطين البراندات العالمية في المناطق دي وجذب استثمارات بمليارات الدولارات.. والأهم من دا كله إن المشروع بياكد متانة وقوة العلاقات المصرية السعودية وإن مفهاش أي توتر زي المنصات المأجورة ما بتتردد في الفترة الأخيرة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
